عمران خان کو امریکہ کا پہلا جھٹکا، پنٹاگن نے منسوخ کردی 300 ملین ڈالر کی مدد
اسلام آباد، 4؍ستمبر (ایجنسی) امریکہ نے پاکستان کی نئی نویلی عمران خان حکومت کو پہلا بڑا جھٹکا دیتے ہوئے اسے دیئے جانے والے 300 ملین ڈالر کی مدد کو منسوخ کردیا ہے۔ ٹرمپ انتظامیہ نے اس سے پہلے دہشت گردوں کے خلاف کسی فیصلہ کن کارروائی میں اسلام آباد کی ناکامی کے سبب یہ فنڈ روک دیا تھا۔
حالانکہ اب خبررساں ادارے رائٹرس نے امریکی فوج کے حوالے سے بتایا کہ اس نے اس فنڈ کو منسوخ کرنے کا فیصلہ کیا ہے۔ امریکی صدر ڈونالڈ ٹرمپ نے اس سے پہلے پاکستان پر اربوں ڈالر کی مدد ملنے کے باوجود امریکہ سے دھوکہ دہی کرنے کا الزام لگایا تھا۔
ایسے میں اب اس تازہ قدم کو دونوں ملکوں کے خراب ہوتے رشتوں کے طور پر دیکھا جارہا ہے۔ پنٹاگن کے ترجمان لیفٹیننٹ کرنل کونے فاکنر نے بتایا کہ امریکی فوج اب یہ رقم دوسری ’’فوری ضرورتوں‘‘ پر خرچ کرے گی۔
اس سے قبل امریکی وزارت خارجہ نے اپنے معاون رہے پاکستان پر اپنی سرزمیں پر پھل پھول رہے حقانی نیٹ ورک اور افغان طالبان جیسی دہشت گرد تنظیموں کے خلاف کارروائی کرنے میں ناکام رہنے کا الزام لگایا تھا۔
امریکی وزیر خارجہ مائک پامپیو کچھ ہی دنوں بعد پاکستان دورہ پر جانے والے ہیں، جہاں نومنتخب وزیراعظم عمران خان سے ان کی ملاقات ہونی ہے۔ ایسے میں دونوں لیڈروں کی اس ملاقات میں دہشت گردوں کے خلاف سخت کارروائی کا موضوع بھی زیربحث آسکتا ہے۔