کرناٹک کی عدالتوں میں زیر التوا مقدموں کی تعداد 70ہزار تک بڑھی
بنگلورو17؍ ستمبر(ایس او نیوز)صرف پانچ مہینوں میں کرناٹک کی عدالتوں میں زیر التوا مقدموں کی تعداد 70 ہزار تک بڑھ گئی ہے گو ججوں کی تعداد اتنی ہی ہے۔اپریل 2018میں مقدموں کی تعداد16.3لاکھ تھی،14ستمبر کو یہ تعداد 16.9لاکھ ہوگئی۔حکومت کی جانب سے جاری کردہ تازہ اعداد کے مطابق ہائی کورٹ کے لیے منظور کردہ ججوں کے 62عہدوں میں سے 30بھرتی کردئے گئے ہیں۔جبکہ ضلعی اور ذیلی عدالتوں کے لیے منظور کردہ 1303عہدوں کے لیے 976جوڈیشیل افسر ہیں جو 25%کی کمی ہے۔زیر التوا مقدموں کی اکثریت(14.7لاکھ) نچلی عدالتوں میں ہے۔ ہائی کورٹ نے بھی اپریل کے 2.1لاکھ سے ستمبر میں 2.2 لاکھ تک اضافہ دیکھا۔صرف گزشتہ ماہ کرناٹک کی عدالتوں میں 1.06لاکھ مقدمے دائر کئے گئے جبکہ صرف 95,900مقدموں کانپٹارا ہوا جس سے زیر التوا مقدموں کی تعداد بڑھ گئی۔ایک جوڈیشیل افسر نے کہا کہ ماہانہ اوسط کم و بیش وہی ہے۔ ایک لاکھ سے زیادہ مقدمے دائر کئے جاتے ہیں اور بیک لاگ کلیر کر نا اور فی الحال موجودہ طاقت کے ساتھ نئے مقدموں پر غور کرنا ناممکن ہے۔