بھٹکل میں رمضان المبارک اور عید الفطر کی مناسبت سے ایڈیشنل ایس پی کی نگرانی میں پیس میٹنگ
بھٹکل:19/جون (ایس اؤنیوز)اترکنڑا ضلع ایڈیشنل ایس پی دیوراج کی نگرانی میں رمضان المبارک اور عید الفطر کی مناسبت سے مختلف مذہبی ذمہ داران کے ساتھ سرکٹ ہاؤس میں پیر کو پیس میٹنگ منعقد ہوئی ۔
میٹنگ میں ایڈیشنل ایس پی دیوراج نے بات کرتے ہوئے کہاکہ موبائیل ، واٹس اپ کے ذریعے کوئی بھی جھوٹی خبروں اور افواہوں کو نہ پھیلائیں ، اگر کسی نے اس طرح کی مذموم حرکت کو انجام دیا تو ان کے خلاف سخت قانونی کارروائی کی جائے گی۔ وہیں عوام سے اپیل کی کہ وہ کسی طرح کی افواہوں پر کان نہ دھریں۔ انہوں نے مسلمانوں سے خاص کر اپیل کی کہ اگر عید الفطر کی نماز عیدگاہ میں ادا کی جاتی ہے تو وہ اپنی سواریوں کا استعما ل نہ کریں تو بہتر ہوگا۔ انہوں نے مسلمانوں سے امن و امان اور پورے مذہبی جذبے کے ساتھ عید الفطر منانے کی اپیل کرتے ہوئے محکمہ پولس کے ساتھ تعائون کرنے کی درخواست کی۔
میٹنگ کی صدارت کرتے ہوئے بھٹکل اسسٹنٹ کمشنر ایم این منجوناتھ نے خطاب کرتے ہوئے کہاکہ قانونی نظام پر عمل کرتے ہوئے امن وامان کو برقرار رکھتے ہوئے عیدوں اور تہواروں کو منانے میں عوام تعاون کریں۔ ڈی وائی ایس پی شیوکمار، تحصیلدار وی این باڈکر ، بھٹکل بلدیہ صدر محمد صادق مٹا، نائب صدر کے ایم اشفاق، نچل مکی وینکٹ رمن مندر کے صدر ایم آر نائک، سابق صدر ڈی بی نائک، تنظیم کے جنرل سکریٹری محی الطاف کھروری وغیرہ موجود تھے۔ سی پی آئی سریش نایک نے نظامت کی۔
یاد رہے کہ گذشتہ سال رمضان المبارک کے موقع پر منعقدہ پیس میٹنگ میں مہمانوں کو چائے اور بسکٹ پیش کرنے پر بھٹکل کے ایک سماجی کارکن ثناء اللہ گوائی نے سخت ناراضگی ظاہر کی تھی ، جس کو دیکھتے ہوئے اس بار تعلقہ انتظامیہ نے رمضان کے مقدس مہینے اور مسلمانوں کے روزوں کا احترام کرتے ہوئے میٹنگ کے اختتام کے بعد میٹنگ ہال کے باہر غیر روزہ داروں کے لئے کولڈ ڈرنکس کا انتظام کیا تھا۔