پاسوان نے مہا دلتوں کے تبدیلی مذہب کے لئے نتیش حکومت کو ذمہ دار ٹھہرایا
پٹنہ، 27؍اگست(ایس او نیوز/آئی این ایس انڈیا)مرکزی وزیر رام ولاس پاسوان نے بہار کے بکسر ضلع میں کچھ مہا دلتوں کے مبینہ تبدیلی مذہب کو ریاست کی نتیش حکومت کی ناکامی قرار دیتے ہوئے آج کہا کہ اگر اس نے اس طبقے کے مفادات کی حفاظت کی ہوتی تو ایسے لوگوں کو یہ قدم نہیں اٹھانا پڑتا۔پاسوان نے آج یہاں نامہ نگاروں سے کہا کہ نتیش حکومت نے مہا دلتوں کے مفادات کو لے کر بڑے بڑے دعوے تو ضرور کئے تھے لیکن ان کے لئے کچھ بھی نہیں کیا گیا۔انہوں نے کہا کہ اگر ریاستی حکومت ان دلتوں کی فلاح و بہبود کے لئے ضروری اقدامات اٹھاتی تو انہیں کبھی اس طرح کے تبدیلی مذہب کی جرات نہیں پڑتی۔پاسوان نے کہا کہ ریاست میں مہا دلتوں کو الگ درجہ دیا گیا۔انہوں نے کہا کہ اگر ریاستی حکومت اس طبقے کو پہلے سہولت دیتی تو اس کی نوبت نہیں آتی۔پاسوان نے آج یہاں فیڈریشن آف پی ٹی آئی ایمپلائز یونینس کی قومی مجلس عاملہ کے اجلاس کے بعد نامہ نگاروں سے بات چیت میں یہ بات کہی۔انہوں نے کہا کہ ریاستی حکومت نے مہا دلتوں کی بنیادی ضروریات کی تکمیل نہیں کی ہے،اگر ان کی ضرورت پوری ہوتی تواس کی نوبت نہیں آتی۔انہوں نے کہا کہ یہ ریاستی حکومت کی ناکامی کا نتیجہ ہے۔قابل ذکر ہے کہ بکسر ضلع میں گزشتہ دنوں مہا دلتوں کی طرف سے مبینہ تبدیلی مذہب کی خبریں آئی تھیں۔