بھٹکل میں پھر پیش آیا سڑک حادثہ؛ مرڈیشور میں اسکوٹر اور ٹمپو کی ٹکر میں دو کی موت؛ دو بچے شدید زخمی
بھٹکل 13/فروری (ایس او نیوز) صبح بھٹکل شہر میں پیش آئے سڑک حادثہ میں ایک عمر رسیدہ شخص کی موت واقع ہوئی تھی، دوپہر ہوتے ہوتے ایک اور حادثہ تعلقہ کے مرڈیشور میں پیش آیا ہے جس میں منکی کے دو لوگ جاں بحق ہوگئے ہیں۔
بتایا گیا ہے کہ دوپہر قریب 3:30 بجے مرڈیشور پولس تھانہ حدود کے بیلور نیشنل ہائی وے پر ایک تیز رفتار ٹمپو اسکوٹر سے ٹکراگئی جس کے نتیجے میں اسکوٹر پر سوار دو لوگ جاں بحق ہوگئے، جبکہ ان کےساتھ موجود دو بچے شدید زخمی ہوگئے۔
مرنے والوں کی شناخت محمد کیف مختصر (19) اور اس کی بڑی بہن آفرین (30) کی حیثیت سے کی گئی ہے۔ حادثے میں آفرین کے دو بچے عظمت (7) اور احمد (3) شدید زخمی ہوئے ہیں اور دونوں کو مرڈیشور آر این ایس اسپتال میں ابتدائی طبی امداد کے بعد منی پال منتقل کیا گیا ہے۔
بتایا گیا ہے کہ محمد کیف بھٹکل انجمن کالج میں بی بی اے سکینڈ ائیر کا طالب العلم تھا۔ وہ بھٹکل نوائط کالونی میں اپنی بہن کے ساتھ ایک کرائے کے مکان میں رہتا تھا۔ آج دونوں بھائی بہن منکی میں اپنے والدین سے ملنے جارہے تھے، جس کے دوران حادثہ پیش آیا۔ حادثے میں آفرین کی موقع پرہی موت واقع ہوگئی، البتہ محمد کیف اسپتال لے جانے کے دوران انتقال کرگیا۔ آفرین کے دونوں بچوں کو بھی شدید چوٹیں آئی ہیں اور دونوں کو نازک حالت میں منی پال لے جایا گیا ہے۔ بتایا گیا ہے کہ آفرین کے شوہر کویت میں رہتے ہیں۔
مرڈیشور پولس تھانہ میں معاملہ درج کیا گیا ہے اور دونوں میتوں کو فی الحال منکی سرکاری اسپتال لے جایا گیا ہے۔
