ودھان سودھا سے ہبال تک فلائی اوور کا منصوبہ زیر غور: پرمیشور
بنگلورو،22؍فروری(ایس او نیوز)شہر کے قلب میں آنے والے ودھان سودھا سے لے کر انتہائی مصروف سڑک کے طور پر جانے پہچانے گئے ہبال جنکشن تک ریاستی حکومت فلائی اوور کی تعمیر کے منصوبے پر غور کررہی ہے۔اس سے پہلے حکومت نے سلک بورڈ جنکشن سے ہبال تک بالائی سڑک کی تعمیر کا منصوبہ مرتب کررہی تھی لیکن اس بالائی سڑک کے لئے مہکری سرکل پر دشواریوں کے اندیشوں کو دیکھتے ہوئے اس میں ترمیم پر غور کیا جارہاہے۔ بتایاجاتاہے کہ تکنیکی رکاوٹوں کے سبب حکومت نے طے کیا ہے کہ مہکری سرکل سے ہبال کے اسٹین مال تک کانکریٹ سے بننے والا فلائی اوور تیار کیا جائے اور پھر مہکری سرکل سے سنٹرل سلک بورڈ تک بالائی سڑک کے منصوبے کو آگے بڑھایا جائے۔ 23کلومیٹر پر مشتمل اس سڑک کا منصوبہ کس نوعیت کا ہوگا جلد ہی نائب وزیراعلیٰ اور بنگلور ضلع انچارج وزیر ڈاکٹر جی پرمیشور ، ٹریفک کے ماہرین اور حکومت کے مختلف شعبوں کے اعلیٰ افسروں کے ساتھ میٹنگ کریں گے۔