نئی دہلی، 27؍ستمبر(ایس او نیوز ؍آئی این ایس انڈیا )راشٹریہ جنتا دل کے صدر لالو پرساد اور بہار کے وزیر اعلی نتیش کمار پر ذات پات اور جرم کی سیاست کرنے کا الزام لگاتے ہوئے جن ادھیکار پارٹی کے چیف اور رکن پارلیمنٹ پپو یادو نے کہا کہ بہار کی ترقی سے ان کا کوئی لینا دینا نہیں ہے اور بے شمار دولت جمع کرنے والے ممبران اسمبلی، ممبران پارلیمنٹ کی آمدنی کے ذرائع کی انفورسمنٹ ڈائریکٹوریٹ (ای ڈی)سے جانچ کرائی جانی چاہیے ۔پپو یادو نے کہاکہ آج بہار میں وزیر اعلی نتیش کمار شراب بندی کے موضوع کو اٹھا رہے ہیں ، تو ان کے ساتھی لالو پرساد شہاب الدین کا نام آگے کرکے اہم مسئلہ سے توجہ بھٹکانے کی کوشش کر رہے ہیں جبکہ ریاست میں جرائم اور جرائم پیشہ افراد کا بول بالا ہو گیا۔تعلیم مافیا، کان کنی مافیا، پانی مافیا، زمین مافیا کا ریاست میں ہر جگہ پر قبضہ ہوتا جا رہا ہے اور حکمران پارٹی غربت، ناخواندگی، بے روزگاری اور صحت جیسے مسائل سے توجہ بھٹکانے کی کوشش میں لگی ہے۔آر جے ڈی سے نکالے گئے ممبر پارلیمنٹ نے میڈیا سے بات چیت میں کہا کہ لالو پرساد کی طرف سے شہاب الدین کو لیڈر کہا جا رہا ہے تو نتیش کمار انہیں غنڈہ بتا رہے ہیں اور پھر بھی نتیش گٹھ بندھن دھرم نبھانے کی بات کرتے ہیں۔اگر شہاب الدین لیڈر ہیں تو لالو پرساد جے ڈی یو کی قیادت والی حکومت سے حمایت واپس لے لیں ۔انہوں نے کہا کہ دین دیال اپادھیائے صدسالہ تقریب سے متعلق کمیٹی میں نتیش کمار کا نام ہونے سمیت حالیہ واقعات سے واضح ہے کہ بہار کے وزیر اعلی اپنے پرانے گھر(این ڈی اے)کی طرف بڑھ رہے ہیں۔پپو یادو نے کہا کہ سیاست میں اطلاعات کا فقدان ہو گیا ہے۔سیاسی لیڈروں کے پاس اچانک بے شمار جائیداد آ جاتی ہے۔اتنی بڑی جائیداد کیسے بنا لیتے ہیں، یہ لیڈران ، اس کی جانچ ہونی چاہیے ۔میں مطالبہ کرتا ہوں کہ بے شمار جائیداد جمع کرنے والے ممبران اسمبلی، ممبران پارلیمنٹ کی آمدنی کے ذرائع کی ای ڈی کے ذریعہ جانچ کرائی جانی چاہیے ۔