بنگلور:17/مارچ(ایس او نیوز)ریاستی حکومت گرام پنچایت ڈیولپمنٹ آفیسر کے عہدہ کو بی گروپ کا عہدہ قرار دینے پر سنجیدگی سے غور کررہی ہے۔یہ بات آج وزیر دیہی ترقیات وپنچایت راج ایچ کے پاٹل نے کہی۔ لیجسلیٹیو کونسل میں وقفہئ سوالات کے دوران ایم کے پرانیش، کوٹا سرینواس پجاری اور دیگر کے سوال کا جواب دیتے ہوئے انہوں نے کہاکہ پی ڈی او کے عہدہ کو بی گروپ تک کی ترقی دینے کیلئے محکمہئ مالیات کو تجویز روانہ کی جاچکی ہے۔وہاں سے منظوری ملتے ہی ضوابط کے مطابق کارروائی کی جائے گی۔ شہر کی ایم ایس بلڈنگ میں محکمہئ دیہی ترقیات وپنچایت راج کے دفتر میں ایک دلت خاتون کی عصمت ریزی کے واقعہ کے سلسلے میں پرانیش کی شکایت پر مداخلت کرتے ہوئے چیرمین ڈی ایچ شنکر مورتی نے کہاکہ پرانیش اس مسئلے پر محکمہ کی مانگوں پر بحث کے دوران روشنی ڈالیں، فی الوقت انہوں نے جو سوال کیا ہے اس کے جواب تک اپنے آپ کو محدود رکھیں۔اس مسئلے پر دیگر جے ڈی ایس ممبران نے بھی سوالات کرنے چاہیں لیکن چیرمین نے تمام ممبران کو خاموش کردیا۔