اسلام آباد،25اپریل(ایس او نیوز/آئی این ایس انڈیا)پاکستان کے قبائلی علاقے کرم ایجنسی میں سڑک کنارے بارودی مواد کے دھماکے میں کم سے کم دس افراد جاں بحق اور تیرہ زخمی ہوگئے ہیں۔میڈیا رپورٹس کے مطابق دھماکا منگل کو صبح سویرے سنٹرل کرم کے علاقے گودر میں ہوا ہے۔ پولیٹکل انتطامیہ کے اہلکاروں کے مطابق یہ دھماکہ مسافر گاڑی کے قریب ہوا ہے۔سرکاری ٹی وی کے مطابق پاڑہ چنار سے صدہ جانے والی مسافر وین گودر کے قریب سڑک پر پہلے سے نصب بارودی مواد سے ٹکرا گئی۔ واقعے کے فوری بعد مقامی افراد اور امدادی اہلکاروں نے زخمیوں کو قریبی اسپتال منتقل کر دیا۔اسپتال انتظامیہ نے دس افراد کے جاں بحق ہونے کی تصدیق کر دی ہے جب کہ 13 زخمیوں کو طبی امداد فراہم کی جا رہی ہے جن میں سے پانچ کی حالت تشویش ناک ہے، دھماکے کے بعد سیکیورٹی فورسز نے علاقے کو گھیرے میں لے کر سرچ آپریشن شروع کر دیا۔پاک فوج کے شعبہ تعلقات عامہ آئی ایس پی آر کے مطابق ایم آئی17 ہیلی کاپٹر پاڑہ چنار پہنچ گیا ہے، جس کے ذریعے شدید زخمیوں کو طبی امداد کے لیے پشاور منتقل کیا جائے گا۔یاد رہے کہ گودر کا علاقہ پاڑہ چنار سے تقریباً 70 کلومیٹر دور دشوار گزار راستوں میں واقع ہے۔ یہ علاقہ انتہائی پسماندہ ہے اور یہاں زیادہ تر شیعہ آبادی رہتی ہے۔کرم ایجنسی میں تشدد کے واقعات تسلسل سے پیش آ رہے ہیں پاڑہ چنار میں گذشتہ ماہ یعنی تیس مارچ کو بھرے بازار میں دھماکے سے اٹھائیس افراد جاں بحق ہو گئے تھے جبکہ اس سے پہلے جنوری کے مہینے میں پاڑہ چنار کی سبزی منڈی میں دھماکے اکیس افراد جاں بحق ہو گئے تھے۔ ان دھماکوں کی زمہ داری کالعدم تنظیم تحریک طالبان نے قبول کی تھی۔