پاکستان کی فوجی عدالت نے کلبھوشن جادھو کی رحم کی درخواست مستردکی
نئی دہلی،16/جولائی (ایس او نیوز/آئی این ایس انڈیا)پاکستان کی ایک فوجی عدالت نے ہندوستانی شہری کلبھوشن جادھو کی رحم کی درخواست مسترد کر دی ہے۔پاکستان میں جادھو کو مبینہ طور پر جاسوسی کے الزام میں موت کی سزا سنائی گئی ہے۔جادھو کو پاکستان کی طرف سے گزشتہ سال مارچ میں گرفتار کیا گیا تھا، اور پاکستان کی فوجی عدالت نے جادھو کو جاسوسی کرنے اور تخریبی سرگرمیوں میں ملوث ہونے کا مجرم قرار دیا تھا۔ہندوستان کا دعوی ہے کہ ہندوستانی بحریہ سے ریٹائر ہو چکے کلبھوشن جادھو کو ایران سے اغوا کیا گیا تھا، جہاں وہ کاروبار کر رہے تھے۔ہفتہ کو پاکستانی فوج کے میڈیا ونگ ’آئی ایس پی آر‘نے کہا ہے کہ اب پاکستانی فوج کے سربراہ قمر جاوید باجوہ جادھو کے خلاف ثبوتوں کا تجزیہ کریں گے اورالزام کی بنیاد پر ان کی اپیل پر فیصلہ کریں گے۔قابل ذکر ہے کہ بین الاقوامی عدالت (آئی سی جے)کے ذریعہ کلبھوشن جادھو کی پھانسی کی سزا پر روک لگائے جانے کے کچھ دنوں بعد پاکستان نے کہا تھا کہ ہندوستانی شہری کو اس وقت تک پھانسی نہیں دی جائے گی، جب تک اس کی رحم کی سبھی درخواستوں پر سماعت مکمل نہیں ہو جاتی۔جادھو کو پاکستانی فوجی عدالت کی طرف سے سنائی گئی موت کی سزا کے خلاف ہندوستان نے آئی سی جے کا دروازہ کھٹکھٹایا تھا۔گزشتہ 18/مئی کو آئی سی جے نے جادھو (46)کی سزا کی تعمیل پر روک لگا دی تھی۔