سی ایم شیوراج کا اعلان، مدھیہ پردیش میں نہیں دکھائی جائے گی ’پدماوتی‘فلم
بھوپال،20؍نومبر(ایس او نیوز؍آئی این ایس انڈیا)سنجے لیلا بھنسالی کی فلم ’پدماوتی‘ کی ریلیز ڈیٹ اگرچہ ٹل گئی ہو لیکن اس فلم کے ساتھ تنازعہ ختم ہونے کا نام نہیں لے رہاہے اب وزیر اعلیٰ شیوراج سنگھ نے اعلان کیا ہے کہ مدھیہ پردیش میں ’پدماوتی‘فلم نہیں دکھائی جائے گی۔اس صورت میں وکیل ایم ایل شرما نے سپریم کورٹ میں عرضی داخل کرکے اس فلم سے متنازعہ چیزوں کو ہٹانے کا مطالبہ کیا ہے۔ساتھ ہی فلم کے پروڈیوسر ڈائریکٹر کے خلاف ایف آئی آر درج کرکے سی بی آئی جانچ کا مطالبہ کیا ہے۔اس سے پہلے راجستھان کی وزیراعلیٰ وسندھرا راجے نے مرکزی حکومت کو خط لکھا تھا۔وسندھرا راجے نے اطلاعات و نشریات کے وزیر اسمرتی ایرانی کوخط لکھ کردرخواست کی تھی کہ ’پدماوتی‘ فلم اس وقت تک ریلیز نہ ہو، جب تک اس میں ضروری تبدیلی نہیں کر دی جائے تاکہ کسی بھی کمیونٹی کے جذبات کو ٹھیس نہ پہنچے۔وہیں کرنی سینا کے احتجاج کے درمیان حال ہی میں سنسر بورڈ آف فلم سرٹیفیکیشن نے بھی فلم کو لے کر اعتراض کیا۔سینسر بورڈ نے فلم ’پدماوتی‘کو دیکھنے سے فی الحال انکار کر دیا۔تکنیکی کمیوں کا حوالہ دیتے ہوئے بورڈ نے فلم کا اپلی کیشن واپس بھیج دیا۔