اُدپی،27نومبر ( ایس او نیوز)وی ایچ پی کے انٹر نیشنل جنرل سکریٹری پروین توگڑیا نے کھلے عام سوال کیا ہے کہ پدماوتی فلم کے پروڈیوسر سنجے لیلا بھنسالی نے اگر ماں کا دودھ پیا ہے تو دیگر مذاہب والوں پر فلم بنائیں۔ وشواہندو پریشد کی اُدپی دھرم سنسد کے تعلق سے ایم جی ایم کالج کے میدان میں اتوار کو منعقدہ دھرم سنسد میں وہ تقریر کررہے تھے۔ انہوں نے کہا کہ بھاگوتی پدماوتی کی قربانی کو الٹنے والی پدماوتی فلم کی نمائش پر پنچاب کی کانگریس حکومت ، راجستھان کی بی جے پی حکومت نے پابندی لگادی ہے۔ انہوں نے مطالبہ کیا کہ تمام ریاستیں بشمول مرکزی حکومت فوری طور پر فلم پر پابندی لگائیں۔ انہوں نے کہا کہ ہندوؤں کے وقار کے تحفظ کے لئے ہمیں کسی رکن پارلیمان رکن اسمبلی، ٹا ٹا ، برلا، دولت مند نہیں چاہئے، ایودھیا کی جھونپڑپٹی میں رہ رہے رام کے لئے ایک مندر کی تعمیر ہو تو کافی ہے۔ انہوں نے میٹنگ میں موجود افراد سے یہ سوال کر کے کہ ’’رام جنم بھومی میں کیا بنے گا‘‘، وہاں موجود لوگوں سے ’رام مندر بنے گا‘ کا جواب پایا۔ انہوں نے کہا کہ مندر کو ایودھیا میں ہی تعمیر کرنے کا عہد کیا گیا ہے۔