بنگلورو،19؍اکتوبر(ایس او نیوز) شہر کے ڈپٹی کمشنر وی شنکر نے کہا ہے کہ شہر بنگلور میں غیر قانونی قبضوں میں جاچکی 15 ہزار ایکڑ سرکاری زمین پر قبضہ بحال کرنے کیلئے ضروری قدم اٹھائے جائیں گے۔اے ٹی رام سوامی کمیٹی کی بنیاد پر شہر میں 394ایکڑ زمین پر سرکاری قبضہ فوری طور پر بحال کیاجائے گا۔ آج ایک اخباری کانفرنس سے خطاب کرتے ہوئے انہوں نے کہاکہ برہت بنگلور مہانگر ضلع کی زمین کا رقبہ 5.3لاکھ ایکڑ ہے ، جس میں سے 122918 ایکڑ زمین سرکاری ہے۔ جس میں سے 34111 ایکڑ غیر قانونی قبضوں میں جاچکی ہے جس کی نشاندہی اے ٹی رام سوامی کمیٹی رپورٹ نے کی تھی۔ ان غیر قانونی قبضوں میں تالاب ، گومال، اے اور بی خراب زمین شامل ہیں۔ انہوں نے کہاکہ ان میں سے 7881 ایکڑ زمین سرکاری اسکولوں ، اسپتالوں اور عوامی مقاصد کیلئے استعمال کی جارہی ہیں جن کو خالی کرایا نہیں جاسکتا۔ تاہم بعض گومال اور دیرینہ قبضوں کو باقاعدگی دینے کیلئے درخواستیں موصول ہوئی ہیں ان کو بھی منظوری دے دی جائے گی۔ بنگلور کے اطراف 18 کلومیٹر کے دائرہ میں گومال ، اکرما سکرما ضوابط کے تحت قبضہ کی گئی زمینات کو باقاعدگی دینے کیلئے قدم اٹھائے جائیں گے۔انہوں نے کہاکہ شہر میں غیر قانونی قبضوں میں جاچکی زمینوں کو باقاعدگی دینے کے بعد غیر قانونی قبضوں میں جانے والی زمین کا رقبہ محض 394 ایکڑ رہ جائے گا۔ جس کو تیزی سے خالی کرایا جائے گا۔بنرگٹہ روڈ کی اپولو اسپتال، نوجیون ٹرسٹ ، کونن کنٹے سوسائٹی ، ٹیک کام ایجوکیشن سوسائٹی اداروں کی طرف سے بڑی بڑی زمینوں پر قبضے کئے گئے ہیں ان زمینوں کے استعمال کے مقصد کو تبدیل کرکے قبضہ کرنے والوں پر جرمانہ کرنے کے ساتھ بازار کی قیمت الہ آباد ہائی کورٹ کے احکامات کے مطابق طلب کی جائے گی۔