بنٹوال میں بے قابوکار کی زد میں آنے والی ماں شدید زخمی، ۳ سالہ بچی ہلاک۔ کئی موٹر بائکس کو نقصان
بنٹوال8؍فروری (ایس او نیوز)مورجے نامی مقام پر ایک تیز رفتار کار بے قابو ہونے کی وجہ سے پیش آنے والے حادثے میں ایک خاتون شدید زخمی ہوگئیں جبکہ اس کی ۳ سالہ بچی زخموں کی تاب نہ لاتے ہوئے اسپتال میں فوت ہوگئی۔ اس کے علاوہ اس بے قابو کار کی زد میں آنے والی پارک کی ہوئی کئی موٹر بائکس کو شدید نقصان پہنچا ۔
بتایاجاتا ہے کہ ہلاک ہونے والی بچی کانام وائشاوی ہے۔پرمیلا نامی خاتون اپنے کسی رشتے دار کے گھر پربچے کی پیدائش کے تعلق سے منائے جارہے پروگرام میں شرکت کے بعدبیٹی وائشاوی کو لے کر گھر واپسی کے لئے سڑک کنارے کھڑی تھی کہ اچانک ایک نانو کار بے قابو ہوکر ان کی طرف بڑھی اور انہیں کچلنے کے بعد ذرا آگے پارک کی گئی موٹر بائکس سے ٹکراگئی۔شدیدزخمی ماں اور بیٹی کو فوری طور پر منگلورو کے ایک نجی اسپتال میں منتقل کیاگیا مگر بچی کو بچایا نہیں جاسکا۔
پولیس نے معاملہ درج کرنے کے بعدحادثے کے لئے ذمہ دار کار ڈرائیورمحی الدین صاحب کو گرفتار کرلیاہے۔