بنگلورو،9؍مارچ(ایس او نیوز) ریاستی کابینہ نے کل جس صوبائی پرچم کو اپنانے کا فیصلہ کیا ہے آئندہ تمام سرکاری پروگراموں میں اس پرچم کا استعمال کیا جاسکتاہے۔ یہ بات آج وزیر اعلیٰ سدرامیا نے کہی۔ مختلف ترقیاتی پروگراموں کے افتتاح کے سلسلے میں آج یہاں آمد کے بعد پریا پٹنہ میں اخبار ی نمائندوں سے بات چیت کرتے ہوئے سدرامیا نے کہاکہ صوبائی پرچم کے تمام رہنما خطوط کو قطعیت دی جاچکی ہے، اس پرچم کا ایک اپنا مقام اور مرتبہ رہے گا، اور اس کیلئے باضابطہ فلاگ کوڈ مرتب کیا جائے گا۔ ہر ایک کو اس کا احترام کرنا لازمی ہوگا۔ ہاسن ضلع کی ڈپٹی کمشنر روہنی سندوری کے تبادلے پر مرکزی اڈمنسٹریٹیو ٹریبونل کے اسٹے آرڈر پر تبصرہ کرنے سے انکار کرتے ہوئے سدرامیا نے کہاکہ سرکاری افسران کے تبادلوں کے معاملے پر عوامی بحث نہیں کی جاسکتی۔ میسور کے ورونا اسمبلی حلقہ میں جنتادل (ایس) صدر ایچ ڈی کمار سوامی کی وکاس پرویاترا کے متعلق تبصرہ کرتے ہوئے وزیر اعلیٰ نے کہاکہ جنتادل (ایس) ایک سیاسی جماعت ہے اسے عوامی پروگرام کے اہتمام کرنے کا پورا اختیار حاصل ہے، اس پر وہ تبصرہ کرنا نہیں چاہتے۔ انہوں نے کہاکہ کوئی بھی سیاسی پارٹی صرف عام جلسوں یا ریلیوں سے انتخابات جیت نہیں سکتی، اس سے پہلے بھی مختلف سیاسی جماعتوں نے جلسے اور ریلیوں کا اہتمام کیا ہے، لیکن کامیابی انہیں کو ملی ہے جنہوں نے عوام کیلئے کچھ کیا ہو۔ سابق وزیر ایچ وشواناتھ کے اس بیان پر کہ سدرامیا نے لوک آیوکتہ ادارے کو برباد کردیا ہے، وزیر اعلیٰ نے کہاکہ اس بیان پر وہ تبصرہ کرنا درست نہیں سمجھتے ۔اس موقع پر وزیر توانائی ڈی کے شیوکمار نے کہاکہ ریاست میں بجلی اور پانی کی کوئی قلت نہیں ہے۔ اگلے چار ماہ تک ریاست میں بجلی کا بحران نہ ہونے پائے اس کیلئے مختلف ذرائع سے بجلی کا ذخیرہ کیا جارہا ہے۔ وزیر برائے تعمیرات عامہ ڈاکٹر ایچ سی مہادیوپا بھی اس موقع پر موجود تھے۔