یتیم خانوں اوربزرگوں کے گھروں کو مفت چاول کی فراہمی: قادر
بنگلور:18/مارچ(ایس او نیوز) ریاستی وزیر برائے شہری رسد وخوراک یوٹی قادر نے کہاکہ ریاستی حکومت انا بھاگیہ اسکیم کی طرف خصوصی توجہ دے رہی ہے۔ یکم اپریل سے اس اسکیم کے تحت بی پی ایل کارڈوں پر تقسیم ہونے والے چاول کی مقدار میں اضافہ کیا گیا ہے۔ اب پانچ کلو کی بجائے ماہانہ سات کلو چاول دئے جائیں گے۔ وزیر موصوف نے کہاکہ ریاست بھر میں یتیم خانوں، مفت کھانا مہیا کرانے والے مراکز اور دیگر بزرگوں کے گھروں وغیرہ کو حکومت کی طرف سے چاول مفت فراہم کئے جائیں گے۔آج ایک اخباری کانفرنس سے خطاب کرتے ہوئے وزیر موصوف نے بلگام میں بتایاکہ انا بھاگیہ اسکیم کے تحت اس بار وزیر اعلیٰ کی طرف سے بجٹ میں چاول کی مقدار بڑھانے کے ساتھ ایک خاندان کو ایک کلو تور دال، جن لوگوں کے پاس ایل پی جی کنکشن نہیں ہے دیہی علاقوں میں انہیں تین لیٹر مٹی کا تیل، جن کے پاس گیس ہے انہیں ایک لیٹر مٹی کا تیل مہیا کرانے کا بھی فیصلہ کیا ہے۔ یوٹی قادر نے بتایاکہ یتیم خانوں، بزرگوں کے گھروں اور مختلف اداروں اور انجمنوں کی طرف سے مفت کھانا مہیا کرانے کیلئے قائم مراکز کو اناج مفت مہیا کرایا جائے گا۔ انہوں نے بتایاکہ بلگام ضلع میں راشن کارڈ نظام کے تحت ماہانہ تیرہ لاکھ لیٹر سے زائد مٹی کا تیل مہیا کرایا جارہاہے، جن بی پی ایل کارڈ ہولڈروں کی طرف سے مٹی کا تیل نہیں خریدا جائے گا حکومت کی طرف سے انہیں انیل بھاگیہ اسکیم کے تحت گیس کی فراہمی کا انتظام کیا جائے گا یا پھر ریچارجیبل ایل ای ڈی لائٹ مہیا کرائے جائیں گے۔