منظم جرائم کسی خاص ریاست تک محدود نہیں: سپریم کورٹ
نئی دہلی، 22؍ اکتوبر(ایس او نیوز؍آئی این ایس انڈیا) سپریم کورٹ نے کہا ہے کہ منظم جرائم کسی خاص ریاست تک محدود نہیں ہے اور کوئی نچلی عدالت سخت مکوکا لگانے کے لئے مجرموں کے خلاف ریاست کے باہر دائر کئے گئے الزامات کے متعلق تفصیلی معلومات لے سکتی ہے۔مہاراشٹر منظم جرائم کنٹرول آئین (مکوکا) منظم جرائم پر روک لگانے کے لئے مجرموں کے خلاف لگایا جاتا ہے۔یہ قانون دہلی میں بھی نافذہے۔جسٹس ایس اے بوبڑے اور جسٹس ایل ناگیشور راؤ کی بنچ نے مذکورہ تبصرہ ہائی کورٹ کے فیصلے کے خلاف دہلی حکومت کی اپیل پر سماعت کرتے ہوئے کیا۔ ہائی کورٹ نے اتر پردیش کے مبینہ گینگسٹر برجیش سنگھ کو کئی بنیادوں کے تحت مکوکا کے تحت الزامات سے بری کرنے کے نچلی عدالت کے فیصلے کو برقرار رکھا تھا۔ان بنیادوں میں ایک بنیاد منظم جرائم گروہ چلانے کو لے کر چارج شیٹ قومی دارالحکومت کے باہر دائر کرنا بھی شامل تھا۔ عدالت عظمی نے ہائی کورٹ کے حکم کو برقرار رکھتے ہوئے کہا کہ مکوکا کی دفعہ 2 (ڈی) میں دیا گیا لفظ ’قابل عدلیہ‘ دہلی میں عدالتوں تک محدود نہیں ہے اور مسلسل غیر قانونی سرگرمی پیدا کرنے والوں کے خلاف دیگر ریاستوں میں دائر مقدما ت کا بھی نوٹس لیا جا سکتا ہے۔