کانگریس کے آندھرا پردیش کے انچارج کے عہدہ سے دگ وجے سنگھ کی چھٹی، اومان چانڈی کو ملی ذمہ داری
نئی دہلی،27؍مئی (ایس او نیوز؍ آئی این ایس انڈیا )کانگریس صدر راہل گاندھی نے آندھرا پردیش کے لئے انچارج جنرل سکریٹری کا کردار ادا کر رہے پارٹی کے سینئر لیڈر دگ وجے سنگھ کے مقام پر آج کیرل کے سابق وزیر اعلی اومن چانڈی کی تقرری کر دی۔اس کے ساتھ ہی راہل نے سابق مرکزی وزیر سی پی جوشی کو مغربی بنگال اور انڈمان نکوبار کے انچارج کے عہدہ سے آزاد کر گورو گوگوئی کو یہ ذمہ داری سونپی۔کانگریس جنرل سکریٹری اشوک گہلوت کی جانب سے جاری بیان کے مطابق دگ وجے سنگھ کی جگہ چانڈی اور جوشی کے مقام پر گوگوئی کی تقرری فوری طورپر کی گئی ہے۔انہوں نے کہا کہ پارٹی آندھرا پردیش کے انچارج جنرل سکریٹری کی ذمہ داری سے ہٹ رہے دگ وجے سنگھ اور مغربی بنگال اور انڈمان کے انچارج کی ذمہ داری سے ہٹ رہے جوشی کی محنت اور شراکت کی تعریف کرتی ہے۔حال ہی میں سنگھ کو مدھیہ پردیش اسمبلی انتخابات کے لئے قائم رابطہ کمیٹی کا صدر مقرر کیا گیا تھا۔سنگھ کے پاس اب بطور سیکرٹری جنرل تلنگانہ کی ذمہ داری ہے۔ادھر، راجستھان سے تعلق رکھنے والے جوشی سے حال ہی میں بہار کا چارج واپس لے لیا گیا تھا اور یہ ذمہ داری شکتی سنگھ گوہل کو سونپ دی گئی تھی۔جوشی کے پاس اب آسام کی ذمہ داری کے ساتھ شمال مشرقی کے کچھ ریاستوں کا اضافی چارج ہے۔