منگلورو سنٹر ریلوے اسٹیشن میں سیلنگ کا ٹکڑا گرنے سے ایک شخص زخمی
منگلورو 27؍جولائی (ایس او نیوز) منگلورو سنٹرل ریلوے اسٹیشن میں ٹکٹ بکنگ کے لئے قطار میں کھڑا ہوا ایک شخص اس وقت زخمی ہوگیا جب چھت کا ایک ٹکڑااچانک اس کے سر پر گر پڑا۔
موصولہ رپورٹ کے مطابق حسب معمول بہت سارے مسافر بکنگ ایریا میں قطار میں لگے ہوئے تھے۔ اس دوران سیلنگ کا کچھ حصہ جدا ہوکر سیدھے نیچے گرا جس کی زد میں کنّور کیرالہ کابیجو میتھیو نامی شخص آگیاجس سے اس کے سر اور جسم پر چوٹیں آئیں۔ زخمی میتھیو کو وینلاک اسپتال میں داخل کیاگیا ہے جہاں اس کی حالت خطرے سے باہر بتائی گئی ہے۔کہا جاتا ہے کہ میتھیو اپنی والدہ علاج کی غرض سے منگلورو لایا تھا اور واپسی کی ٹکٹ بک کرنے کے لئے قطار میں لگ ہوگیا تھا۔ عوام کا کہنا ہے کہ اس طرح سیلنگ کے ٹکڑے اکھڑنا اور گرنا منگلورو سنٹرل اسٹیشن پر ایک معمول بن گیا ہے۔