متسیھا گندھا ایکسپریس ٹرین میں ایک اور ڈکیتی۔۔نشہ آور جوس پلاکر لوٹے گئے نقدی اور زیورات
اڈپی 7/ اگست (ایس او نیوز) ممبئی سے چلنے والی متسیھا گندھا ایکسپریس ٹرین میں نشہ آور دوا ملی ہوئی کوئی چیز کھلاکر مسافروں کو لوٹنے کی وارداتیں روز بروز بڑھتی جارہی ہیں۔کونکن ریلوے پولیس کے حفاظتی انتظامات کے باوجود زیادہ تر مہاراشٹرا کے کچھ خاص مقامات سے دھوکہ بازوں اور لٹیروں کی ٹیمیں باقاعدگی سے لوٹ کی کارروائیاں انجام دے رہی ہیں۔جس سے ریلوے پروٹیکشن فورس کے حفاظتی بندوبست پرہی سوال اٹھ رہے ہیں۔
موصولہ اطلاع کے مطابق تازہ واردات اڈپی کے ایک بزرگ جوڑے سنجیوا شیٹی (ا۶سال)اوران کی بیوی رتناشیٹی (۵۶سال)کے ساتھ پیش آئی ہے۔ بتایا گیا ہے کہ میاں بیوی نے ممبئی کے تھانے شہر سے اڈپی کے لئے ٹرین کا سفر شروع کیاتھا۔دراصل سنجیواکی اعصابی بیماری کا علاج اڈپی کے اسپتال میں چل رہا تھا۔اور مزید علاج کے لئے یہ لوگ تھانے سے اڈپی کی جانب آرہے تھے۔ اسی کمپارٹمنٹ میں کرلا سے سفر کررہے کچھ نوجوانوں نے اس بزرگ جوڑے سے درخواست کی کہ انہیں کھڑکی کے قریب والی سیٹ پر بیٹھنے دیا جائے۔ بزرگ جوڑے نے بخوشی اپنی سیٹ ان کو دے دی۔ اس کے کچھ دیر بعد نوجوانوں نے ان دونوں کو پینے کے لئے جوس پیش کیا۔ جوس پیتے ہی دونوں گہری نیند میں چلے گئے۔ اتفاق سے اسی ٹرین کے اے سی ڈبے میں ان کا ایک رشتے دارہریش شیٹی بھی سفر کررہا تھا۔ اس نے دوسرے دن صبح کنداپور کے قریب ان سے ملنے کی کوشش کی تو دونوں غنودگی کی حالت میں تھے اور ان کی صحت ابتر دکھائی دے رہی تھی۔ہریش نے ریلوے پروٹیکشن فورس کی مدد سے بزرگ جوڑے کو منی اسپتال میں منتقل کروایا، جہاں ان کا علاج کیا جارہاہے اور ابھی وہ پوری طرح ہوش و حواس میں نہیں ہیں۔
ابتدائی طورپر معلوم ہوا ہے کہ لٹیروں نے اس جوڑے کے پاس موجود 50ہزار روپے نقد، تقریبا 2لاکھ روپے کے زیورات ،45ہزار روپے مالیت کی راڈو گھڑی اور موبائل فون پر ہاتھ صاف کیاہے ۔اس طرح تقریباً 4 لاکھ روپے مالیت کی لوٹ مچائی گئی ہے۔گمان کیا جاتا ہے کہ لٹیرے اپنی کارروائی انجام دینے کے بعد مہاراشٹر ا کے ساونت واڈی میں ٹرین سے اتر گئے ہونگے۔اس ڈکیتی کے بارے میں مہاراشٹر ا کے انجنی پولیس اسٹیشن میں کیس درج کیا گیا ہے۔
