دو سال قبل ہندودیوی کے خلاف فیس بک پر ہتک آمیز تبصرہ کرنے کے الزام میں مینگلور کے شخص کی ممبئی ایئر پورٹ پر گرفتاری
منگلورو 18؍اگست (ایس اونیوز) دو سال قبل فیس بک پر ہندو دیوی سیتا کے تعلق سے نازیبا تبصرہ کرنے کے الزام میں منگلورو پولیس کو مطلوب شخص کو ممبئی ایئر پورٹ پر گرفتار کرلیا گیاجس کا نام درویز محی الدین ( ۲۷سال) کی حیثیت سے کی گئی ہے۔
موصولہ تفصیلات کے مطابق جبار بی سی روڈ کے نام سے ایک نقلی فیس بک اکاؤنٹ کھولاگیا تھا اور اس پررام کی بیوی سیتا کے بارے میں ہتک آمیز تبصرے پوسٹ ہوئے تھے۔ منگلورو نارتھ پولیس اسٹیشن میں درج شکایت پر تحقیقات کے بعدپولیس نے قلندر شفیع بی ایم اور درویز محی الدین نامی دو نوجوانوں کو اس میں ملوث پایا۔ چونکہ ملزمین بیرونی ممالک میں قیام پزیر تھے، اس لئے ان کی گرفتاری کے لئے لُک آؤٹ نوٹس جاری کردئے گئے تھے۔
اکتوبر 2016میں جب قلندر شفیع بیرون ملک سے منگلورو ایئر پورٹ پہنچا تھا تو اس وقت پولیس نے اسے گرفتار کرلیا تھا۔ اب کی بار درویز محی الدین جب بیرون ملک سے ممبئی انٹرنیشنل ایئر پورٹ پر اترا تولُک آؤٹ نوٹس کی بنیاد پر امیگریشن افسران نے اسے روک لیااور منگلورو پولیس کو اطلاع دی۔جس کے بعدمنگلورو نارتھ پولیس نے ممبئی پہنچ کر اسے اپنی تحویل میں لے لیاہے ۔