بھٹکل میں لاری کی ٹمپو سے ٹکر؛ ایک ہلاک؛ دس سے زائد زخمی
بھٹکل 5/اگست (ایس او نیوز) تعلقہ کے شرالی نیشنل ہائی وے پر ٹرک کے ٹمپو کو ٹکرمارنے کے نتیجے میں ٹمپوپر سوار ایک شخص ہلاک ہوگیا جبکہ اس کی اہلیہ سمیت دس سے زائد مسافروں کو چوٹیں آئیں جس میں تین شدید زخمی ہوئے ہیں۔
حادثہ اتوار کی دوپہر قریب تین بجے اُس وقت پیش آیا جب ٹمپو بھٹکل سے مسافروں کو بھر کر ہوناور جارہی تھی کہ شرالی شاردا ہولے کے قریب دولوگوں کو اُتارنے کے لئے ٹمپو نے بریک لگادئے۔ اس دوران پیچھے سے آرہی ایک ٹرک نے ٹمپو کو ٹکر ماردی جس کے نتیجے میں ٹمپو اُلٹ کر سیدھے راستہ کنارے واقع نالے میں جاگری۔
بتایا گیا ہے کہ شاردا ہولے کے قریب رہنے والے بھئیرپّا ماستی نائک (50) ٹمپو سے اُترنے کے فراغ میں دروازے کے قریب ہی تھا کہ ٹرک نےپیچھے سے ٹکر ماردی۔ٹکر لگتے ہی بھیئرپا باہر گرگیا اور ٹمپو اُس کے اوپر ہی اُلٹ گئی۔ بھیرپا کو شدید زخمی حالت میں فوری طور پر قریبی اسپتال لے جایا گیا، مگر اُس نے راستے میں ہی دم توڑ دیا۔ حادثے میں اس کی اہلیہ لکشمی بھیرپا نائک کو معمولی چوٹیں آئی ہیں۔
بتایا جارہا تھا کہ ٹرک ٹمپو کو ٹکر مارکر فرار ہوگئی ہے، مگر پولس نے بتایا کہ ٹمپو کو ٹکر مارنے کے بعد لاری کافی آگے جاکر رُک گئی تھی اور پولس نے لاری کو اپنی تحویل میں لے لیا ہے۔
ٹمپو چونکہ سڑک کنارے نالے میں جاکر اوندھی ہوگئی تھی، مقامی لوگ فوری اُن کی مدد کے لئے لپک پڑے اور سبھی زخمیوں کو باہر نکال کر شرالی اسپتال پہنچایا۔ بتایا گیا ہے کہ ٹمپو میں قریب 20 مسافر سوار تھے، 12 لوگوں کو معمولی چوٹیں آئی ہیں، البتہ تین لوگ شدید زخی ہوئے ہیں جن میں سے ایک کو کنداپور اسپتال، ایک کو مرڈیشور اور ایک کو بھٹکل سرکاری اسپتال میں داخل کیا گیا ہے۔
حادثے کی اطلاع ملتے ہی بھٹکل پولس انسپکٹر گنیش اور مضافاتی پی ایس آئی روی سمیت پولس اہلکار جائے وقوع پر پہنچ گئے اور ضروری کاروائیاں انجام دیں۔
بھٹکل مضافاتی پولس تھانہ میں معاملہ درج کیا گیا ہے۔
