بھٹکل 17/فروری (ایس او نیوز) ممبئی میں پیش آئے ایک سڑک حادثہ میں احمد آباد کے ایک نوجوان کی موقع پر موت واقع ہوگئی، جبکہ بھٹکل کا ایک نوجوان شدید زخمی ہوگیا جسے اسپتال میں داخل کیا گیا ہے۔

بتایا گیا ہے کہ بھٹکل کا ربیط خلیفہ ابن عمر خلیفہ (24) ممبئی کے اپنے دوست انیس (24) کے ساتھ باندرہ سے بذریعہ بائک واپس آرہا تھا کہ سنتا کروز میں پیچھے سے ایک تیز رفتار کار نے ان کی بائک کو ٹکر ماردی۔ ممبئی سے جناب محمد ریاض جاکٹی صاحب نے فون پر بتایا کہ  پیچھے سے بائک کو ٹکر مارنے کےبعد کار فرار ہوگئی۔  انیس چونکہ بائک کی پچھلی سیٹ پر سوار تھا، حادثے میں موقع پر ہی جاں بحق ہوگیا، جبکہ ربیط  خلیفہ  کے سر کو چوٹ لگی ہے اور  اسے ممبئی رحیجا اسپتال میں داخل کیا گیا ہے۔ جناب ریاض صاحب نے بتایا کہ سر پر ہیلمٹ ہونے کے باوجود سر کو شدید چوٹ لگی ہے۔ انہوں نے تمام لوگوں سے اس کی جلد صحت یابی  کے لئے دُعا کی درخواست کی  ہے۔