بھٹکل انجمن کالج فور ویمن کی طالبات کا شاندار پرفارمینس پیش کرنے کا سلسلہ جاری؛ بی اے میں سو فیصد نتائج؛ سائنس اور کامرس کی طالبات کا بھی شاندار مظاہرہ
بھٹکل 21/جون (ایس او نیوز) انجمن کالج فور ویمن کی طالبات نے گذشتہ سالوں کی طرح امسال بھی تعلیم کے میدان میں زبردست پرفارمینس پیش کرتے ہوئے پوری ریاست میں بھٹکل کا نام روشن کردیا ہے۔
پرنسپال رئیسہ شیخ کی جانب سے جاری کردہ پریس ریلیز کے مطابق امسال بی اے کے چھٹے سمیسٹر میں طالبات نے سو فیصدی کامیابی درج کی ہے تو بی ایس سی اور بی کام میں بالترتیب 92.68 فیصد اور 95.80 فیصد اوسط کے ساتھ شاندار کامیابی حاصل کی ہے۔
بی کام فائنل میں ایک طالبہ فرحین دیکاش بنت محمد امین معلم نے سب سے زیادہ 94.57 فیصد اوسط کے ساتھ زبردست کامیابی درج کرتے ہوئے کالج میں اول مقام حاصل کیا ہے، توقع ہے کہ یونیورسٹی لیول پر بھی اُسے ٹاپ ٹین میں جگہ مل سکتی ہے۔
پریس ریلیز کے مطابق بی اے چھٹے سمیسٹر میں جملہ 49 طالبات امتحانات میں شریک ہوئیں تھیں، سبھی طالبات کامیاب رہی ہیں، مزید خوشی کی بات یہ ہے کہ 49 میں سے 31 طالبات نے امتیازی نمبرات سے کامیابی حاصل کی ہیں۔ اسی طرح بی ایس سی میں جملہ 41 طالبات نے امتحان دیا تھا 38 طالبات کامیاب ہوئی ہیں جس میں 28 امتیازی نمبرات سے کامیاب ہوئی ہیں۔ شعبہ کامرس میں امسال 72طالبات میں سے 69 کامیاب ہوئی ہیں اور 46 طالبات نے امتیازی نمبرات لئے ہیں۔
بی اے میں تحیّہ تسکین بنت عبداللہ شیخ نے کالج میں 89.11 فیصد اوسط کے ساتھ اول رینک حاصل کیا ہے، بی بی صالحہ بنت ضیاء الدین کولا نے شعبہ سائنس میں 89.70 فیصد کے ساتھ اول رینک پر ہے، جبکہ شعبہ کامرس میں فرحین دیکاش نے اول رینک سے کامیابی درج کی ہے۔
کالج پرنسپال رئیسہ شیخ نے طالبات کے اس شاندار پرفارمینس پر نہایت اطمینان کا اظہار کرتے ہوئے بتایا کہ بچے اگر پوری محنت اور لگن کے ساتھ پڑھائی کریں تو اعلیٰ سے اعلیٰ نمبرات لے کر کامیاب ہوسکتے ہیں، انہوں نے اس کامیابی کے لئے بچوں کے والدین کے ساتھ ساتھ کالج کی معلمات کو بھی کریڈٹ دیا کہ کالج لیکچررس بھی طالبات پر کافی محنت کرتے ہیں اور ہر اسٹوڈینٹ کی کارکردگی پر خصوصی نگاہ رکھی جاتی ہے کہ وہ کسی بھی شعبہ میں کمزور نہ ہونے پائیں۔ انہوں نے مزید بتایا کہ کالج میں بچوں کی تعلیم کے ساتھ ساتھ اُن کی تربیت پر بھی خصوصی توجہ دی جاتی ہے۔
انجمن ویمن کالج کے اس شاندار پرفارمینس پر انجمن حامئی مسلمین بھٹکل کے صدر جناب عبدالرحیم جوکاکو اور جنرل سکریٹری جناب صدیق اسماعیل نے تمام طالبات اور اُن کے والدین کے ساتھ ساتھ کالج پرنسپال اور دیگر معلمات کو بھی مبارکباد پیش کی ہیں۔ جناب عبدالرحیم جوکاکو نے بتایا کہ گذشتہ کئی سالوں سے انجمن ویمن کالج کی طالبات شاندار پرفارمینس پیش کررہی ہیں اور نہ صرف بھٹکل لیول پر بلکہ کئی سالوں سے ہماری طالبات یونیورسٹی لیول پر بھی رینک حاصل کرنے میں کامیاب ہورہی ہیں ۔
