علی گڑھ،:31/ جنوری (ایس اونیوز /آئی این ایس انڈیا) اتر پردیش کے علی گڑھ میں مہاتما گادھی کے پتلے پر پستول سے گولی چلانے کے معاملے کو لے کر پولیس حرکت میں آگئی ہے۔اس معاملے میں ہندو مہاسبھا کی خاتون لیڈر سمیت 13لوگوں کے خلاف مقدمہ درج کیا گیا ہے اور دو افراد کو حراست میں لے کر پوچھ گچھ کی جا رہی ہے۔بتا دیں کہ بدھ کو مہاتما گاندھی کی 71ویں برسی کے دن علی گڑھ کے نورنگ آباد علاقے میں ان کے پتلے پر ایئر پسٹل سے فائرنگ کرنے کا معاملہ سامنے آیا تھا۔علی گڑھ کے سینئر پولیس سپرنٹنڈنٹ آکاش کلہری نے بتایاکہ بدھ کو گاندھی کی برسی کے موقع پر آج نورنگ آباد علاقے کے ایک گھر میں ہندو مہاسبھا کے کارکنوں نے گاندھی کے پتلے پر ایئر پسٹل سے گولیاں داغی،اس کا ویڈیو وائرل ہو گیا ہے۔ساتھ ہی انہوں نے بتایا کہ سوشل میڈیا پر ویڈیو کے وائرل ہونے کے بعد ہندو مہاسبھا کے 13کارکنوں کے خلاف مقدمہ درج کیا گیا ہے، اس میں ہندو مہاسبھا کی خاتون لیڈرپوجا شگن پانڈے کا نام بھی شامل ہے۔پوجا شگن پانڈے نام کی یہ عورت لیڈر ہندو مہاسبھا کی قومی جنرل سکریٹری ہے۔علی گڑھ کے اے ایس پی نیرج جادون نے کہا کہ بدھ کو ہندو مہاسبھا کے رکن ناتھورام گوڈسے کی طرح مہاتما گاندھی کے پتلے پر گولی چلاتے نظر آئے،وہ گوڈے کی تعریف کررہے تھے۔معاملے کا نوٹس لیتے ہوئے مقدمہ درج کر دو افراد کو حراست میں لیا گیا ہے،ان سے پوچھا جا رہا ہے۔وہیں پولیس نے باقی ملزمین کی تلاش شروع کردی ہے۔علی گڑھ میں گاندھی کے پتلے کو گولی پانڈین نے گولی مار دی۔ویڈیو میں مہاتما گاندھی کے پتلے کو گولی لگنے کے بعد اس میں سے خون بہتے ہوئے بھی دیکھاجاسکتاہے۔معلومات کے مطابق ہندو مہاسبھا نے اس طرض ناتھورام گوڈسے کایوم شہادت منایا۔اس دوران پانڈین نے کارکنوں کے درمیان مٹھائی بھی تقسیم کی۔بتا دیں کہ ناتھورام گوڈسے نے 30جنوری 1948کو مہاتما گاندھی کو گولی مار کر قتل کر دیا تھا، جس کے بعد اسے پھانسی پر لٹکا دیا گیا تھا۔یہ پہلی بار نہیں ہے جب ہندو مہاسبھا نے گوڈسے کی ستائش کی ہو، بلکہ ہر سال اس کی برسی کو یوم شہید کے طور پر منا رہی ہے۔مہاتما گاندھی کی 70ویں برسی پر بدھ کو پارٹی اور اپوزیشن کے تقریبا تمام رہنماؤں نے انہیں خراج عقیدت پیش کیا۔وزیر اعظم نریندر مودی، صدر رام ناتھ کووند اور کانگریس صدر راہل گاندھی سمیت کئی سینئر لیڈروں نے دہلی واقع راج گھاٹ پر پہنچ کر انہیں خراج عقیدت پیش کیا۔