پٹنہ:20/جولائی(ایس او نیوز /ٓئی این ایس انڈیا)لوک سبھا میں نریندر مودی حکومت کے خلاف عدم اعتماد کی تجویز پر ہو رہی بحث کے دوران کانگریس صدر راہل گاندھی کی تقریر کے بعد ان کے 'آنکھ مارنے' کے ا سٹائل کا راشٹریہ جنتا دل (آر جے ڈی) کے رہنما اور بہار کے سابق نائب وزیر اعلی تیجسوی پرساد یادو نے تعریف کی اور اسے صحیح جگہ پر نشانہ بتایا۔ تیجسوی یادو نے ایوان میں راہل کی تقریر کے بعد ان کے آنکھ مارنے والی تصویر شیئر کرتے ہوئے ٹویٹ کیا کہ میرے دوست، آنکھ صحیح جگہ ماری ہے۔ جہاں نظر آئے وہیں یلغار کریں۔ ان کے جھوٹ کے پلندوں کا کچا چٹھا کھولنے اور ایک شاندار تقریر کے لئے بہت بہت مبارک ہو۔ اس سے پہلے تیجسوی یادو نے یہاں بہار اسمبلی کے مانسون سیشن کے پہلے دن اسمبلی احاطے میں نامہ نگاروں کے ساتھ بات چیت کرتے ہوئے کہا کہ عدم اعتماد کی تجویز کا مقصد صرف حکومت گرانا نہیں، بلکہ اس کی غلط پالیسیوں کو بے نقاب کرنا بھی ہوتا ہے۔ انہوں نے کہا کہ آر جے ڈی اس سیشن میں نہیں تو اگلے سیشن میں نتیش کمار حکومت کے خلاف عدم اعتماد کی تجویز پر غور کرے گی اور اس کی پالیسیوں کو عوام کے سامنے لائے گی۔ تیجسوی یادو نے کہا کہ این ڈی اے کے اندر کی مخالفت بھی سامنے آئی ہے۔ شیوسینا کے واک آؤٹ سے ثابت ہو گیا کہ اتحادی بھی اس حکومت سے ناراض ہیں ۔ انہوں نے کہا کہ موجودہ حکومت آئین اور غریب مخالف حکومت ہے۔ مرکز اور ریاست کی حکومت کو عوام سے کوئی مطلب نہیں رہ گیا ہے محض اقتدار کی عیش کوشی ہی ان کا مطمح نظر رہ گیا ہے ۔