اوکلی پورم سگنل فری کاریڈور پر کام تیزی سے جاری،چار لین کی شاہراہ عنقریب کھول د ی جائے گی
بنگلورو۔16؍جنوری(ایس او نیوز) شہر کے اوکلی پورم جنکشن سے میجسٹک کے سنگولی راینا جنگشن تک زیر تعمیر آٹھ لائن سگنل فری کاریڈور میں سے چار لائن کا کام مکمل کرلیا گیا ہے، گزشتہ سال جون میں شروع ہونے والا کام رواں سال دسمبر کے اختتام تک پورا ہوجائے گا،اور اس وقت تک تمام آٹھ لائنوں سے ٹریفک کے گزرنے کا انتظام کیا جاسکتا ہے۔ اس پراجکٹ کیلئے محکمۂ ریلویز کی 3.16 ایکڑ زمین حاصل کی گئی ہے۔ 115 کروڑ روپیوں کی لاگت پر زیر تعمیر اس پراجکٹ کیلئے ریلویز کی طرف سے دی گئی زمین کے عوض بنی مل کی 3.16 ایکڑ زمین ریلویز کے حوالے کی گئی ہے۔ یہاں پر گاڑیاں گزرنے کیلئے آٹھ لائن شاہراہ تعمیر ہوگی اس کے علاوہ دو انڈر پاس گاڑیوں کیلئے اور دو انڈر پاس راہگیروں کیلئے تعمیر کئے جائیں گے۔ اس کے علاوہ شہر میں محکمۂ ریلویز کی طرف سے مارچ کے اختتام تک دس انڈر برڈج کاموں کی تکمیل کی جائے گی، جبکہ بی بی ایم پی کی طرف سے جاری آٹھ برڈجوں کے کاموں کو بھی فوری طور پر مکمل کرلینے کی ہدایت دی گئی ہے۔ اس علاقہ میں 20دسمبر 2012 کو سگنل فری کاریڈور کی تعمیر کا سنگ بنیاد رکھا گیا تھا، یہاں پر ریلویز کی طرف سے زمین فراہم کرنے میں تاخیر کے علاوہ بیسکام ، بی ڈبلیو ایس ایس بی اور بی ایس این ایل کی لائنوں کا ذخیرہ ہونے کے سبب مرحلہ وار انہیں منتقل کیاگیا۔ عموماً مصروف ترین ٹریفک کے سبب مسائل سے دو چار اوکلی پورم میں اس آٹھ لائن شاہراہ کی تکمیل سے ٹریفک کا نظام سہل ہوگا اور ساتھ ہی یہاں سے سٹی ریلوے اسٹیشن ، میجسٹک، آنند راؤ سرکل ، ملیشورم ، بسویشورا نگر، وجئے نگر ،راجہ جی نگر اور ماگڑی روڈ تک پہنچنے میں آسانی ہوگی۔