بھٹکل موگلی ہونڈا میں آئیل ٹینکر اُلٹ گیا؛ آزاد اسپورٹس سینٹر کے اراکین نے کی مدد
بھٹکل 18/نومبر (ایس او نیوز) یہاں موگلی ہونڈا نیشنل ہائی وے 66 پر رات قریب گیارہ بجے ایک خالی آئیل ٹینکر اُلٹ جانے سے نیشنل ہائی وے بند ہوگیا، مگر علاقہ کے آزاد اسپورٹس سینٹر کے اراکین نے فوری اپنا تعائون پیش کرتے ہوئے دوسری ایک لاری کی مدد سے ٹینکر کو سیدھا کرکے سڑک کنارے لے جانے میں کامیاب ہوگئے۔
بتایا گیا ہے کہ ٹینکر بیلگام سے مینگلور جارہی تھی، کسی سواری کو اوورٹیک کرنے کی کوشش میں اچانک مخالف سمت سے دوسری سواری کو دیکھ کر ڈرائیور کاتوازن کھو گیا اور سڑک کنارے ٹینکر کو لے جانے کے نتیجے میں ٹینکر اُلٹ گئی۔ حادثے میں ڈرائیور بھی محفوظ رہ گیا، البتہ ٹینکر اُلٹ جانے سے ٹینکر کو نقصان پہنچا۔
قریب آدھے گھنٹے تک نیشنل ہائی وے بند رہا، مگر تعجب کی بات یہ رہی کہ پولس کا کوئی اہلکار اس دوران جائے وقوع پر نظر نہیں آیا البتہ علاقہ کے نوجوانوں نے ہی ٹینکر کو نکال کر ہائی وے کو سواریوں کے لئے کھول دیا۔
ہائی وے کے دونوں طرف سواریوں کی کافی لمبی قطار جمع ہوگئی تھی ،گاڑیوں پر سوار لوگوں نے نوجوانوں کے فوری طور پر مدد فراہم کرنے کا جذبہ دیکھ کر اُن کی ستائش کی اور ہائی وے کو سواریوں کے لئے فوری طور پر کھولنے پر اُن کا شکریہ ادا کیا۔
