خصوصی ریاست کا درجہ دینے کا مطالبہ جاری رکھے گا اڑیسہ: نوین پٹنائک
بھونیشور10 مارچ (ایس او نیوز؍ آئی این ایس انڈیا) اڑیسہ کے وزیر اعلی نوین پٹنائک کا کہنا ہے ان کی پارٹی ور ان کی حکومت ریاست کو خصوصی ریاست کا درجہ دیے جانے کی مانگ جاری رکھے گی۔ پڑوسی ریاست آندھرا پردیش کی طرف سے خصوصی ریاست کا درجہ دینے کے مطالبہ کے سلسلے میں نامہ نگاروں کے سوالات کا جواب دیتے ہوئے پٹنائک نے کہاکہ ہم ہمیشہ سے اڑیسہ کے لئے خصوصی ریاست کے درجہ کی کوشش کر رہے ہیں، ہم پھر سے اپنے مطالبات کا اعادہ کریں گے ۔ اس سے پہلے لوک سبھا میں بی جے ڈی کے لیڈر بھرت ہری مہتاب نے کہا تھا کہ اگر مرکز آندھرا پردیش کو خصوصی ریاست کا درجہ دیتا ہے تو اڑیسہ بھی اپنی مانگ میں شدت لائے گا ۔ مہتاب نے صحافیوں کو بتایاکہ اڑیسہ طویل مدت سے خصوصی ریاست کے درجہ کی مانگ کر رہا ہے، تاہم اگر پڑوسی ریاست آندھرا پردیش کو اس کا درجہ ملتا ہے تو ہم کو بھی اپنی مانگ میں شدت لانی ہوگی ۔ وزیر اعلیٰ نے حال ہی میں پالیسی کمیشن کے نائب صدر راجیو کمار کے ساتھ ہوئی ملاقات میں اڑیسہ کو خصوصی ریاست کا درجہ دینے کا مطالبہ دہرایا ۔