مینگلور: اوکھی طوفان میں پھنسے ماہی گیروں کی مدد کو پہنچی کوسٹ گارڈ کی ٹیم
منگلورو 4؍دسمبر (ایس او نیوز)اوکھی طوفان کی وجہ سے بیچ سمندر میں پھنسے ہوئے ماہی گیروں کی مدد کے لئے کوسٹ گارڈ کی ٹیم پہنچی اور ایک بوٹ کو تیکنیکی امداد پہنچانے کے علاوہ دیگر کشتیوں پر پھنسے ہوئے ماہی گیروں کو کھانا،کپڑے ، طبی امداد وغیرہ فراہم کرنے کا کام بھی انجام دیا۔
موصولہ رپورٹ کے مطابق تاتواماسی نامی بوٹ پر 22ماہی گیر پھنسے ہوئے تھے۔ اس بوٹ کے گیئر باکس میں خرابی کی وجہ سے انجن بند پڑگیا تھا اور بوٹ طوفانی موجوں پر ہچکولے کھاتے ہوئے پہاڑی چٹانوں سے ٹکرانے کی طرف بڑھ رہی تھی۔ اس موقع پر انڈین کوسٹ گارڈ شِپ امرتیاپر موجود ٹیم وہاں پہنچ گئی اور گیئر باکس کی مرمت کرتے ہوئے بوٹ کو کنارے تک لانے میں کامیاب ہوگئی۔اس کے علاوہ کوسٹ گارڈ کے شُور نامی جہاز پر موجود ٹیم نے لکشدیپ کے پاس طوفان میں پھنسے ہوئے سینٹ اینٹونی نامی جہاز کے ماہی گیروں کوکھانے پینے کا سامان ، کپڑے اور طبی ا مداد پہنچائی۔
کوسٹ گارڈ کے پی آر او نے بتایا کہ طوفانی موجوں اور خراب موسم کی وجہ سے بہت سارے ماہی گیر جہاز کاروار کی خلیج میں پناہ لیے ہوئے ہیں،جس میں تملناڈو کے 32جہازاور346ماہی گیر، کیرالہ کے 14جہاز اور103ماہی گیر، گوا کے 27جہاز اور565ماہی گیر،منگلورو کے 21جہاز اور 114ماہی گیر، ملپے کے 35جہازاور119ماہی گیر شامل ہیں۔اسی طرح منگلوربندرگاہ میں النفیسہ اورمیسا نامی دو جہاز پناہ لیے ہوئے ہیں جن پر ۹ اور۱۰ ماہی گیر بالترتیب موجود ہیں، اور یہ دونوں جہاز منگلورو کی پرانی بندرگاہ سے تعلق رکھتے ہیں۔