اجیت ڈوبھال کے بیٹے نے جے رام رمیش اور انگریزی میگزین کے خلاف درج کرایاہتک عزتی کاکیس
نئی دہلی، 21جنوری(ایس او نیوز؍آئی این ایس انڈیا) قومی سلامتی کے مشیر(این ایس اے)اجیت ڈوبھال کے بیٹے وویک ڈوبھال نے اپنے خلاف خبر چھاپنے والی انگریزی میگزین دی کارواں کے مدیر، رپورٹر اور کانگریس لیڈر جے رام رمیش کے خلاف دہلی کی پٹیالہ ہاؤس کورٹ میں مجرمانہ ہتک عزت کا مقدمہ درج کرایا ہے۔دراصل انگریزی میگزین کارواں نے ایک رپورٹ میں انکشاف کیا تھا کہ نوٹ بندی کے ٹھیک بعد وویک ڈوبھال نے ٹیکس ہیون- کیمین آئی لینڈ میں ہیج فنڈ کمپنی کارجسٹریشن کرایا۔اس کے بعد کیمن جزائر سے ہندوستان میں آنے والی سرمایہ کاری میں زبردست اضافہ ہوا تھا۔کانگریس کے لیڈر جے را رمیش نے اس رپورٹ کا حوالہ دیتے ہوئے وویک ڈوبھال کے کاروبار کو D-Companyکا نام دیا تھا۔وویک ڈوبھال کی دلیل ہے کہ میگزین میں شائع مضمون غلط، گمراہ کن اور بے بنیاد حقائق پر مبنی ہے جسے وہ کورٹ میں ثابت کر دیں گے۔انہوں نے اپنی اپیل میں کہا ہے کہ جو لوگ اس غلط مضمون پر مبنی بیانات کرتے ہیں اور بیانات پر تبصرہ کرتے ہیں وہ حقائق کی تحقیقات بھی نہیں کرتے ہیں،لہذا وہ اس کے برابر شراکت دار ہیں۔غور طلب ہے کہ انگریزی میگزین دی کارواں نے اپنی رپورٹ میں انکشاف کیا تھا کہ وزیر اعظم کی طرف سے نوٹ بندی کے اعلان کے 13دن بعداین ایس اے اجیت ڈوبھال کے بیٹے وویک ڈوبھال نے کیمین آئی لینڈ میں جی این وائی ایشیا فنڈ نام کی ہیج فنڈ (سرمایہ کاری فنڈ)کمپنی کا رجسٹریشن کرایا ۔رپورٹ کے مطابق وویک ڈیوال کا کاروبار ان کے بھائی شوریہ ڈوبھال سے متعلق ہے۔میگزین کے اس انکشاف کو بنیاد بناتے ہوئے کانگریس لیڈر اور سابق مرکزی وزیر نے کانگریس ہیڈکوارٹر سے میڈیاسے خطاب کرتے ہوئے الزام لگایا کہ اجیت ڈوبھال کے دونوں بیٹے جی این وائی ایشیا کے جال میں پھنسے ہے، جو بالکل ڈی کمپنی کی طرح ہے۔