آپ کی حمایت کے لیے کینیڈا سے ہوائی جہاز میں بھر کر آ رہے ہیں این آر آئی
نئی دہلی،18/جنوری (ایس او نیوز/آئی این ایس انڈیا)پنجاب انتخابات میں عام آدمی پارٹی کی حمایت میں تشہیر کرنے کے لیے کینیڈا سے آج ہوائی جہاز بھر کر حامی دہلی پہنچ رہے ہیں۔’چلو پنجاب‘نام کی مہم کے تحت 300سے زیادہ تارکین وطن سے بھر ا طیارہ آدھی رات کو دہلی اترے گا۔ان این آر آئی حامیوں کے استقبال کے لیے دہلی کے نائب وزیر اعلی منیش سسودیا اور پارٹی کے این آر آئی انچارج کمار وشواس دہلی ایئرپورٹ پر خود موجود رہیں گے۔حالانکہ اس سے پہلے بھی آپ کے این آر آئی حامی پنجاب میں پارٹی کی تشہیر میں پہنچے ہیں اور تشہیر میں مصروف ہیں، لیکن وہ چھوٹے چھوٹے گروپوں میں آئے ہیں اور اب ایک ساتھ اتنی بڑی تعداد میں این آرآئی حامیوں کا ایک ساتھ دہلی میں لینڈ کرنا عام آدمی پارٹی کے حوصلے کو بڑھادے گا۔پارٹی نے سوشل میڈیا پر اس کی کچھ تصاویربھی پوسٹ کی ہیں۔
