ہندوستان کے برانڈ ایمبیسڈرہیں ہندنژادتارکین وطن:مودی
وارانسی،22جنوری(ایس او نیوز؍آئی این ایس انڈیا) منگل کو وزیر اعظم نریندر مودی نے تارکین وطن کو ہندوستان برانڈ ایمبیسڈر قرار دیا اور کہا کہ وہ ملک کی صلاحیتوں کی علامت ہیں۔وزیراعظم نے اپنے پارلیمانی حلقے وارانسی میں 15ویںیوم تارکین وطن کے افتتاح کے دوران یہ بات کہی۔انہوں نے یہاں موجود لوگوں سے کہا کہ میں تارکین وطن کو ہندوستان کا برانڈ ایمبیسڈر مانتا ہوں،وہ ہماری صلاحیتوں اور تعاون کی علامت ہیں۔مودی نے کہاہے کہ ہند نژاد لوگ ماریشس، پرتگال اور آئر لینڈ جیسے ممالک میں رہ رہے ہیں۔مودی نے راجیو گاندھی کے اس بیان کا ذکر کیا جس میں انہوں نے کہا تھا کہ ایک روپے میں سے صرف 15پیسے ہی لوگوں تک پہنچ پاتے ہیں۔انہوں نے کہا کہ کانگریس حکومت نے اس بربادی کو روکنے کے لیے کچھ نہیں کیا۔وزیراعظم نے کہا کہ ان کی حکومت نے صورتحال کو بہتر بنانے کے اقدامات کئے ہیں،کانگریس کی حکمرانی کے دوران ہورہی 85فیصد لوٹ کوٹیکنیکل ٹیکنالوجی کے ذریعہ 100فی صد تک روک لگادی ہے۔مودی نے کہا کہ ہم نے ان لوگوں کو 580000کروڑ رو پے دئے ہیں جو مختلف منصوبوں کے تحت ان کے بینک اکاؤنٹس میں ٹرانسفرہوئے،تصور کریں کہ اگر ملک پرانے نظام کے مطابق چل رہا ہوتا تو 450000کروڑ روپے غائب ہو جاتے۔کانگریس پر حملہ کرنے کے دوران انہوں نے کہا کہ یہ ’لوٹ ‘کوپہلے ہی روکاجاسکتا تھا لیکن ایسا کرنے کا کوئی ارادہ اور طاقت ہی نہیں تھی۔انہوں نے کہا کہ ہماری حکومت اس بات کو یقینی بنانے کیلئے اقدامات کر رہی ہے کہ مختلف منصوبوں کے تحت براہ راست مالی امداد فائدہ مندوں کے اکاؤنٹس تک پہنچ جائیں۔تقریب کے مہمان خصوصی ماریشیس کے وزیر اعظم پرین جگن ناتھ نے وزیر اعظم مودی کو ’اسکل انڈیا‘اور ’بیٹی بچاؤ،بیٹی پڑھاؤ‘کے منصوبوں کے ذریعے ہندوستان میں تبدیلی کرنے کے لئے تعریف کی۔انہوں نے عالمی توانائی پر صاف توانائی کو فروغ دینے اور بین الاقوامی شمسی اتحاد قائم کرنے کے لئے مودی کی قیادت کی بھی تعریف کی۔جگن ناتھ نے اگلے مہینے بھگود گیتا تہوار اور اگلے سال بھوجپوری تہوار کا بھی اعلان کیا۔پہلی بار یہ کانفرنس 9جنوری کے بجائے 21جنوری سے 23جنوری کے درمیان منعقد کیا جا رہا ہے، تاکہ لوگ یہاں آنے والے پریاگراج کے کمبھ میلے میں حصہ لیں اور پھر قومی دارالحکومت میں یوم جمہوریہ کے پریڈ پروگرام میں حصہ لیں۔ایک بیان میں وزیر اعظم کے دفتر نے کہا کہ اس سال کانفرنس کا مرکزی موضوع ’نئے ہندوستان کی تخلیق میں خاندان کا کردار‘ہے۔