بنگلورو،13؍ جنوری(ایس اونیوز؍عبدالحلیم منصور) تملناڈو کی طرف سے دریائے کاویری سے پانی مہیا کرانے ریاستی حکومت کو جو مکتوب لکھا گیا ہے اس پر ردعمل ظاہر کرتے ہوئے وزیر اعلیٰ سدرامیا نے کہاکہ کاویری سے تملناڈو کو پانی فراہم کرنا ممکن نہیں ہے۔ اخباری نمائندوں سے بات چیت کرتے ہوئے سدرامیا نے کہاکہ ایسے مرحلے میں جبکہ کرناٹک میں ہی پانی کی شدید قلت ہے تملناڈو کو پانی فراہم نہیں کیا جاسکتا۔ انہوں نے کہاکہ کاویری آبی تنازعہ ٹریبونل کے فیصلے کا چیلنج کرتے ہوئے سپریم کورٹ میں جو عرضی دائر کی گئی ہے اس پر اگلے ماہ عدالت عظمیٰ کا فیصلہ آنے کی امید ہے۔حکومت کو توقع ہے کہ فیصلہ کرناٹک کے حق میں ہوسکتاہے۔ دریائے مہادائی کے تنازعہ اور حکومت گوا کی طرف سے کرناٹک کو پانی مہیا کرانے سے صاف انکار پر ردعمل ظاہر کرتے ہوئے سدرامیا نے کہاکہ اس صورتحال پر تبادلۂ خیال کیلئے جلد ہی ایک کل جماعتی اجلاس طلب کیا جائے گا۔ اور ریاست میں اس سے نمٹنے کیلئے آگے کی حکمت عملی پر بات چیت کی جائے گی۔ وزیر اعلیٰ نے کہاکہ وزیراعظم مودی کی مداخلت ہی اس مسئلہ کو سلجھاسکتی ہے۔ سدرامیا نے ریاستی بی جے پی قائدین سے گذارش کی کہ اس مسئلہ پر سیاست کو بالائے طاق رکھ کر وزیراعظم سے گذارش کریں کہ وہ اس مسئلہ کو سلجھانے کیلئے فوراً مداخلت کریں۔