ریاستی حکومت شمالی کرناٹک کی ہمہ جہت ترقی کی پابند: پرمیشور
بنگلورو،9؍اگست(ایس او نیوز) ریاستی نائب وزیر اعلیٰ ڈاکٹر جی پرمیشور نے کہا ہے کہ ریاستی حکومت شمالی کرناٹک کی ہمہ جہت ترقی کی پابند ہے۔
اخباری نمائندوں سے بات چیت کرتے ہوئے انہوں نے کہاکہ شمالی کرناٹک کی ترقی کے لئے عنقریب17 سو کروڑ روپیوں کا خصوصی پیاکیج وضع کیا جائے گا۔انہوں نے کہا کہ ریاستی عوام کی یہ خواہش ہے کہ کرناٹک متحد رہے اور ملک کی ترقی یافتہ ریاستوں میں اپنے مقام کو اور بھی بلندی کی طرف لے جائے۔ کسی بھی حال میں علاحدگی پسند ی کی آواز یں ریاست میں نہ اٹھیں۔
ریاستی بی جے پی کے سینئر لیڈر کے ایس ایشورپا کے اس بیان پر کہ مخلوط حکومت وزراء سرکاری افسروں اور ملازمین کے تبادلوں کے ایجنٹ بن چکے ہیں۔ ڈاکٹر پرمیشور نے کہاکہ ایشورپا کو حکومت پر الزامات لگانے کے علاوہ کچھ کام نہیں ہے، وہ اپنا کام کرتے رہیں اور حکومت اپنا کام کرے گی۔ ڈاکٹر پرمیشور نے کہاکہ ہر کانگریسی کی خواہش ہے کہ راہل گاندھی ملک کے وزیر اعظم بنیں۔ لیکن انتخابات کے بعد اگر حالات سازگار نہ ہوں تو ممتا بنرجی یا مایاوتی یا پھر کوئی بھی قومی رہنما کی قیادت میں اگر سیکولر حکومت قائم ہوتی ہے تو کانگریس اس حکومت کے ساتھ رہے گی۔
انہوں نے کہاکہ آنے والے لوک سبھا انتخابات میں کانگریس کو زبردست کامیابی کا یقین ہے۔ خاص طور پر کرناٹک میں بی جے پی کا صفایا کرنے کے لئے پارٹی کارکنوں نے ابھی سے کمر کس لی ہے۔ ریاستی کی سیکولر طاقتیں مل کر بی جے پی کو ضرور سبق سکھائیں گی۔