بنگلورو،27؍جولائی(ایس او نیوز) سابق ریاستی وزیر اور سینئر کانگریس لیڈر ایم بی پاٹل نے کہا ہے کہ شمالی کرناٹک کو علاحدہ ریاست قرار دینے کا مطالبہ غیر ضروری ہے۔ اس کی بجائے یہ جدوجہد کرنی چاہئے کہ اس علاقے کو زیادہ سے زیادہ ترقی دی جائے۔

اخباری نمائندوں سے بات چیت کرتے ہوئے انہوں نے کہاکہ کسی بھی حال میں شمالی کرناٹک سے ناانصافی ہونے نہیں دی جائے گی۔ متحدہ کرناٹک کی فکر کے ساتھ ترقی یافتہ شمالی کرناٹک کا تصور غلط نہیں، لیکن علاحدہ ریاست کا مطالبہ غلط ہے۔ ایم بی پاٹل نے کہاکہ ہر ایک کو اس بات کا دکھ ہے کہ شمالی کرناٹک نے اس رفتار سے ترقی نہیں کی جس رفتار سے جنوبی ریاست کے شہر ترقی کررہے ہیں۔ حکومت کو اس طرف متوجہ کرانے کی ضرورت ہے کہ شمالی کرناٹک میں بھی رفتار ترقی کو اس قدر بڑھائی جائے کہ وہ ریاست کے دیگر ترقی یافتہ علاقوں کا مقابلہ کرنے کی صلاحیت پیدا کرسکیں۔ ایسا کرنے کی بجائے الگ ریاست کے لئے تحریک چلانے کی بات کرنا غیر دانشمندی ہے۔ بیجاپور کے رکن اسمبلی بسون گوڈا پاٹل کے اس بیان پر کہ اگر وہ ریاست کے وزیر داخلہ ہوتے تو تمام دانشوروں کو گولی ماردیتے ، ایم بی پاٹل نے کہاکہ اس طرح کے بیانات دے کر بسون گوڈا پاٹل یاتو بی جے پی کے زہریلی زبان والے مرکز ی وزیر اننت کمار ہیگڈے سے مسابقت کررہے ہیں یا پھر یہ ثابت کررہے ہیں کہ ان کا دماغی تواز ن بگڑ چکا ہے۔