انکولہ میں نارتھ کینرا مسلم یونائٹیڈ فورم کا اہم اجلاس
انکولہ، 4اکتوبر (ایس او نیوز) نارتھ کینرا مسلم یونائٹیڈ فورم کا ایک اہم اجلاس انکولہ میں منعقدہوا جس میں فورم کی کارکردگی اور درپیش مسائل پر گفتگو کی گئی۔ پورے ضلع شمالی کینرا کے نمائندوں پر مشتمل اس فورم کی رفتار کار اس میعاد میں کچھ سست ہوجانے اور عہدیداروں کی طرف سے بر موقع مناسب اقدامات نہ کیے جانے کی شکایت سامنے آئی ۔
اجلاس کی صدارت فورم کے جواں سال قائد جناب امتیاز شیخ نے کی ۔ انہوں نے ضلع کے نمائندوں اور تعلقہ کمیٹیوں کے ذمہ داران کی طرف سے آپسی رابطہ نہ ہونے اور مسلمانوں کو درپیش مسائل کو سنجیدگی سے حل کرنے میں دلچسپی نہ دکھانے کی بات کہی۔ صدر صاحب نے کہا کہ ضلع کے کسی بھی کونے سے تعلقہ کمیٹی اور انتظامیہ کے اراکین ان سے رابطہ کریں گے تو وہ ہر طرح سے تعاون کرنے کے لئے ہمیشہ تیار ہیں۔لہٰذا اس بات پر زور دیا گیا کہ فوری طور پر ہرتعلقہ میں نارتھ کینرا مسلم یونائٹیڈ فورم کے دفاتر یا رابطہ مراکز قائم کیے جائیں۔جہاں سے اس علاقے کے مسلمانوں اور طلبہ کے مسائل حل کرنے کی کوشش کی جائے۔
فورم کے سیکریٹری جناب محسن قاضی نے کچھ رکاوٹوں اور مسائل کا ذکر کرتے ہوئے کہا کہ اس میعاد میں وہ مستعدی کے ساتھ کام انجام دینے اور فورم کو متحرک رکھنے میں پوری طرح کامیاب نہیں رہے۔ انہوں نے نئے عزم و حوصلے کے ساتھ انتظامیہ کے تعاون اور اشتراک سے فورم کو متحرک اور فعال بنانے کی ہر ممکنہ کوشش کا وعدہ کیا۔ اور جلد ہی فورم کا انتظامی اجلاس منعقد کرتے ہوئے اس میں نئی منصوبہ بندی کے ساتھ فورم کی اگلی سرگرمیوں کا خاکہ پیش کرنے کی بات کہی۔اس اجلاس میں فورم کے فاونڈر ممبرس اور انتظامیہ اراکین کی کثیر تعداد موجودتھی ۔