شہر میں غیر قانونی طور پر مقیم تین پاکستانی باشندے گرفتار
بنگلورو:25/مئی(ایس او نیوز) شہر میں غیر قانونی طور پر مقیم تین پاکستانی باشندوں کو مشتبہ حالت میں پولیس نے گرفتار کرلیاہے۔ ان میں دو خواتین بھی شامل ہیں۔ کمار سوامی لے آؤٹ میں روپوش پاکستانی خواتین قاصبہ شمس الدین، کرن غلام علی اور محمد شاہد کو گرفتار کرکے پولیس ان سے پوچھ تاچھ کررہی ہے۔پولیس کمشنر پروین سود نے آج یہ بات بتائی۔انہوں نے کہاکہ پاکستان سے قطر، قطر سے مسقط اور مسقط سے نیپال کے کھٹمنڈوتک پہنچنے کے بعد پٹنہ کے ذریعہ یہ تینوں بنگلور پہنچے تھے، پچھلے 9ماہ سے یہ بنگلو رمیں مقیم ہیں، ان کے ساتھ کیرلا کا ایک باشندہ محمد شہاب بھی مقیم تھا۔ بتایاجاتاہے کہ شہاب کی بہن کا نکاح سمیر نامی ایک شخص سے ہوا ہے۔یہاں آکر ٹھہرنے کے بعد ان لوگوں نے انتخابی شناختی کارڈ اور آدھار کارڈ بھی بنوالیا ہے۔ بتایاجاتا ہے کہ شہاب نے قاصبہ کی بہن سے نکاح کیاتھا اور نیپال کے ذریعہ اسے بنگلور لانے میں مدد کی تھی۔ پولیس ان کی گرفتاری کے بعد بنگلور میں ان کے مقیم رہنے کی وجہ کے بارے میں سختی سے تحقیقات کررہی ہے۔ان کے بارے میں معلومات یکجا کرنے کیلئے خصوصی پولیس ٹیم تشکیل دی گئی ہے۔ ان کے پاس سے ایک لیاپ ٹاپ، موبائل فون اور دیگر اشیاء ضبط کی گئی ہیں۔