وزیراعلیٰ کمار سوامی کے یوٹرن سے سیاسی حلقوں میں ہلچل لوک سبھا انتخابات کے بعد کانگریس جے ڈی ایس اتحاد ٹوٹ جائے گا؟ کمار سوامی لوک سبھا انتخابات تک ہی مخلوط حکومت کے وزیراعلیٰ ہوں گے؟
بنگلورو16؍جون (ایس او نیوز) ’’اگلے ایک سال تک مجھے کوئی ہاتھ نہیں لگاسکتا۔ اگلے لوک سبھا انتخابات تک میں ہی وزیراعلیٰ ہوں‘‘ وزیراعلیٰ ایچ ڈی کمار سوامی کو اچانک اس طرح کا بیان دینے کی نوبت کیوں پیش آگئی ہے۔ مخلوط حکومت میں ساجھیدار کانگریس اور جے ڈی ایس کے درمیان اندرونی اختلافات تو شروع نہیں ہوگئے؟ کمار سوامی کے اچانک اس طرح کے بیان سے کئی شک و شبہات پیدا ہوگئے ہیں۔ شہر میں آج منعقدہ ایک تقریب میں شرکت کے دوران نامہ نگاروں سے بات کرتے ہوئے کمار سوامی کے اس بیان سے سیاسی حلقوں میں کھلبلی مچی ہوئی ہے۔ ریاستی اسمبلی انتخابات میں کسی بھی پارٹی کو اکثریت نہ ملنے پر کانگریس اور جے ڈی ایس نے مل کر مخلوط حکومت بنائی تھی اس دوران خود کانگریس کے کئی سینئر لیڈروں نے اعلان کیاکہ آئندہ 5؍سال کمار سوامی ہی مخلوط حکومت کی قیادت کریں گے لیکن آج کمار سوامی کے اچانک اس یوٹرن پر سیاسی حلقوں میں ہلچل مچی ہوئی ہے۔ کیا واقعی کمار سوامی لوک سبھا انتخابات تک ہی مخلوط حکومت کے وزیراعلیٰ ہوں گے؟کمار سوامی کے اچانک اس بیان سے کئی سوالات پیدا ہوگئے ہیں۔ کیا کمار سوامی کو ابھی سے یہ محسوس ہونے لگا ہے کہ انہیں لوک سبھاا نتخابات کے بعد ہٹادیا جائے گا؟ یا پھر لوک سبھا انتخابات کے بعد کانگریس اپنی تائید واپس لے لے گی۔ ان حالات میں اپنا اقتدار بچانے کے لئے کیا کمار سوامی پھر ایک بار فرقہ پرست بی جے پی کی گود میں چلے جائیں گے۔ یا پھر وہی ہوگا جو بی جے پی چاہتی ہے۔ بی جے پی کو اسمبلی میں اپنی اکثریت ثابت کرنے کے لئے صرف 9؍اراکین اسمبلی کی ضرورت ہے۔ بی جے پی اس تاک میں ہے کہ آپریشن کنول کے ذریعہ جے ڈی ایس اور کانگریس اراکین کو خرید لیا جائے۔ دونوں کانگریس اور جے ڈی ایس کے آپسی اختلافات کی وجہ سے کیا بی جے پی اپنے مقصد میں کیا کامیاب ہوجائے گی یا پھر اگلے ایک سال بعد ریاست میں تازہ اسمبلی انتخابات کی نوبت پیش آجائے گی؟ یہ تمام ایسے سوالات ہیں جن کا جواب دینا قبل از وقت ہوگا۔