کانگریس سے مفاہمت کی بات کرنے والے دیوے گوڈا شام ہونے تک بدل گئے۔ کہا کانگریس سے مفاہمت کا سوال ہی نہیں اٹھتا
بنگلورو،27؍مارچ(ایس او نیوز) سابق وزیر اعظم ایچ ڈ ی دیوے گوڈا جنہوں نے آج صبح یہ بیان دے کر ریاست کے سیاسی حلقوں کو حیرت میں ڈال دیا تھا کہ کانگریس اگر آمادہ ہو تو جنتادل (ایس) انتخابی مفاہمت کیلئے تیار ہے، لیکن شام ہوتے ہوتے دیوے گوڈا صاحب نے اپنا بیان سے ہی مکر گئے اور کہا کہ انہوں نے یہ جملے کانگریس کی حرکتوں پر نکتہ چینی کرتے ہوئے کہا مزاقاً کہا تھا۔ گوڈا نے کہا کہ جنتادل (ایس) اپنے بل پر انتخاب لڑے گی۔ کانگریس کے ساتھ وہ کسی بھی حال میں مفاہمت کرنے کے موقف میں نہیں ہے۔ دیوے گوڈا نے مزید کہاکہ انہوں نے کانگریس سے مفاہمت کا بیان مزاحیہ طور پر دیا تھا جس کو میڈیا نے الگ ہی ڈھنگ سے پیش کرنے کی کوشش کی ہے، جس سے انہیں بہت دکھ ہوا ہے۔
انہوں نے کہاکہ آج صبح کچھ ترقی پسند تنظیموں نے ان سے ملاقات کرکے بی جے پی کو شکست دینے کے لئے کانگریس سے مفاہمت کی تجویز پیش کی تھی ، اس مرحلے میں انہوں نے یہی کہاتھاکہ مفاہمت کے لئے اب وقت کس کے پاس ہے؟۔ انہوں نے کہاکہ ریاستی اسمبلی انتخابات 12؍ مئی کو ہوں گے اور گنتی 15مئی کو ۔18؍ مئی ان کا جنم دن ہے۔ انہیں یقین ہے کہ جنتادل (ایس) ریاست میں جیت کا جشن ان کے جنم دن کے موقع پر منائے گی۔ دیوے گوڈا نے کہاکہ تین دنوں سے ریاستی حکومت نے انتہائی من مانی سے کام لیتے ہوئے تبادلے کئے ہیں۔ اس سلسلے میں تمام تفصیلات منظر عام پر لائی جائیں گی، اور الیکشن کمیشن کے علم میں یہ بات لائی جائے گی۔ دیوے گوڈا نے کہاکہ کسی بھی حال میں کانگریس سے مفاہمت کا سوال ہی نہیں اٹھتا۔ ریاست میں جنتادل (ایس) اپنے بل بوتے پر اکثریت حاصل کرے گی، اور عوام کمارا سوامی کو ریاست کا وزیراعلیٰ بنائیں گے۔