اس ملک میں کسی کی ہمت نہیں ہے کہ ریزرویشن ختم کر دے: نتیش کمار
پٹنہ 20مارچ (ایس او نیوز؍آئی این ایس انڈیا) بہار کے وزیر اعلیٰ نتیش کمار نے آج کہا کہ اس ملک میں کسی کی ہمت نہیں ہے کہ ریزرویشن ختم کر دے ۔ نتیش نے کہا کہ پسماندہ طبقہ یا دلتوں کے لیے جو ریزرویشن ہیں اس کے ساتھ کوئی چھیڑ چھاڑ نہیں کر سکتا۔ دراصل نتیش آج ایک پروگرام میں تیجسوی یادو کے حال ہی میں دیے گئے بیانات کا جواب دے رہے تھے ، تاہم انہوں نے تیجسوی یادو کا ایک بار بھی نام نہیں لیا۔. نتیش کے نشانے پر آج تیجسوی یادوسے زیادہ ان کے والد لالو یادو رہے اس موقع پر انہوں نے کہا کہ جب منڈل کمیشن کی رپورٹ پورے ملک میں لاگو کیا گیا، تو بہار میں بھی اس کے اطلاق کی کوشش کی گئی، جبکہ یہاں کرپوری ٹھاکر فارمولہ کی بنیاد پر ریزرویشن کی تجویز تھی ۔ انتہائی پسماندہ طبقہ کے لیے اس فارمولے میں مزید اصلاح کی گئی تھی ، لیکن منڈل کمیشن کی بنیاد پر نظام ہونے پر ان کے حصے میں کمی ہوئی۔نتیش نے کہا انہوں نے اس کی مخالفت کی۔ نتیش نے لالو پر نشانہ لگاتے ہوئے پوچھا کہ جب لالو رابڑی حکومت تھی۔ تب پنچایت میں بہت پسماندہ ذاتوں کے لیے یہ انتظامات کیوں نہیں کئے گئے۔ انہوں نے کہا کہ ان کی حکومت نے 2006 میں نہ صرف 20 فیصد انتہائی پسماندہ ذاتوں کے لیے ریزرویشن کا انتظام کیا، بلکہ خواتین کے لئے 50 فیصد ریزرویشن کیا گیا۔