ضمنی انتخابات میں بی جے پی کی شکست پر کانگریس صدر پرمیشور نے کہا؛ ریاست کرناٹک میں مودی لہرنہیں چل سکی
بنگلور، 13 اپریل (ایس او نیوز) ریاستی کانگریس کے صدر اور ریاست کے وزیر داخلہ جی پرمیشور نے آج کہا کہ ریاست کی گنڈل پیٹ اور ننجن گڈھ اسمبلی سیٹوں پر ہوئے ضمنی انتخابات میں حکمران کانگریس کی جیت سے ثابت ہو گیا ہے کہ ریاست میں کوئی مودی لہرنہیں ہے ۔مسٹر پرمیشور نے یہاں پریس کانفرنس میں کہا کہ اس جیت سے یہ بھی ثابت ہو گیا ہے کہ کرناٹک کو کانگریس سے آزاد کرنے کا بی جے پی کا دعویٰ دور کا خواب ہے اور اگلے برس ہونے والے اسمبلی انتخابات میں بی جے پی 'ویزن 150' کو حاصل نہیں کر سکے گی۔
انہوں نے کہا کہ مسٹر یڈ یورپا کے سال 2018 میں 150 سیٹیں جیتنے کے خواب کو آخری دو ہندسے ہٹا کر پڑھنا چاہئے ۔ انہوں نے کہا کہ بی جے پی نے ان ضمنی انتخابات کا سیمی فائنل اور کانگریس کے خلاف ریفرنڈم کے طور پر پروپیگنڈہ کیا تھا ،لیکن نتائج سے ثابت ہو گیا ہے کہ سیمی فائنل میں ہی ان کی شکست ہو گئی ہے اور رائے دہندگان نے اس بات کا سرٹیفکیٹ دے دیا ہے کہ سدارمیا حکومت بغیر کسی بدعنوانی کے کام کر رہی ہے ۔مسٹر پرمیشور نے کہا، "ہم شروع سے ہی یہ کہتے آ رہے ہیں کہ یہ ضمنی انتخابات ریفرنڈم نہیں ہو سکتے لیکن بی جے پی کا کہنا تھا کہ اس ضمنی انتخاب کے نتائج حکمران پارٹی کی شکست ثابت ہوں گے ۔ اب ثابت ہو گیا ہے کہ بی جے پی کا اندازہ غلط تھا۔انہوں نے کہا کہ کانگریس کی جیت سے ثابت ہو گیا ہے کہ حکمران پارٹی اور حکومت ایک ساتھ مل کر کام کر رہے ہیں اور دونوں کے درمیان کوئی اختلاف نہیں ہے ۔انہوں نے کہا، "ہم نے انتخابات کے دوران مکمل اتحاد کے ساتھ کام کیا اور لوگوں نے ریاستی حکومت کی پالیسیوں، پروگراموں اور کامیابیوں کی حمایت کی ہے ۔ لوگوں نے اس بات کا سرٹیفکیٹ دیا ہے کہ پارٹی صحیح سمت میں کام کر رہی ہے ۔