این آر سی فہرست سے کوئی بھی ہندوستانی شہری نہیں چھوٹے گا: مودی
سلچر4 جنوری (ایس او نیوز؍آئی این ایس انڈیا ) وزیر اعظم نریندر مودی نے جمعہ کو آسام کے سلچر سے لوک سبھا انتخابات کے لئے بگل پھونک دیا ہے۔ اس دوران انہوں نے جہاں ایک طرف اپنی حکومت کی کامیابیوں کو گنایا، تو وہیں عادتاً دوسری طرف کانگریس پارٹی پر جم کر حملہ بولا۔ اس کے علاوہ انہوں نے یقین دلایا کہ این آرسی کی فہرست میں تمام بھارتی شہریوں کا نام شامل ہوگا ، اس سے کوئی بھی شہری نہیں چھوٹے گا۔ پی ایم مودی کی اس ریلی میں بڑی تعداد میں’’ لوگ‘‘ پہنچے تھے۔ سلچر میں مودی نے کہا کہ بی جے پی کا آسام میں کوئی وجود نہیں تھا، لیکن یہاں کے لوگوں نے ضلع کونسل میں بی جے پی اور اتحادی جماعتوں کو اپنا مکمل حمایت کی، جس کا میں شکریہ ادا کرتا ہوں۔ انہوں نے کہا کہ آپ کی محبت کا قرض میرے اوپر ہے۔ میں ترقی کے لئے کوئی کسر نہیں چھوڑوں گا۔ بی جے پی کی حکومت بننے کے بعد وزیر اعظم کے طور پر میں یہاں 16 بار آ چکا ہوں۔ اس سے پہلے آسام سے رہے وزیر اعظم بھی اتنی بار یہاں نہیں آئے۔ انہوں نے کہا کہ بی جے پی حکومت بڑے فیصلے تو لیتی ہی ہے، ساتھ ہی سخت فیصلے بھی لیتی ہے۔جلسے سے خطاب کرتے ہوئے پی ایم مودی نے کہا کہ میں آپ کو یقین دلانے آیا ہوں کہ این آ رسی کی فہرست سے کوئی بھی ہندوستانی شہری نہیں چھوٹے گا، این آر سی کی کاروائی کے عمل کے دوران آپ لوگوں کو کافی پریشانی ہوئی ہے، جس کا مجھے احساس ہے۔ انہوں نے کہا کہ ہمارے رہتے ہوئے ملک کی یکجہتی اور خودمختاری سے سمجھوتہ قطعی نہیں ہو سکتا ہے۔ آسام صرف ایک علاقہ نہیں ہے، بلکہ بے پناہ امکانات اور ثقافتوں سے بھرا ہوا ہے۔بھارت حکومت کے لئے اپنے شہریوں کا تحفظ، عزت اور خوشحالی کے قطعی طور پر سنجیدہ ہے۔