نئی دہلی، 20؍جون (ایس او نیوز؍آئی این ایس انڈیا )شہری ہوا بازی کے وزیر مملکت جینت سنہا نے منگل کو بتایا کہ غلط برتاؤ کرنے والے مسافروں کو ہوائی سفر سے روکنے کے لیے ’نو-فلائی لسٹ‘ تیار ہو رہی ہے اور یہ جولائی کے پہلے ہفتے میں جاری ہوگی۔مرکزی وزیرمملکت نے کہا کہ نو-فلائی لسٹ سے متعلق سول ایوی ایشن رکوایئر منٹ (سی اے آر)پر اسٹیک ہولڈروں کی رائے لینے کے بعد ترمیم شدہ سی اے آر کو حتمی شکل دی جائے گی اور پھر اسے نوٹیفائڈ کیا جائے گا۔قابل ذکرہے کہ مرکزی حکومت نے ایئر انڈیا کے ملازم کے ساتھ شیوسینا کے ممبرپارلیمنٹ رویندر گائیکواڑ کی مبینہ مارپیٹ کے بعد اس قسم کے واقعات پر لگام لگانے کے لیے موجودہ قانون میں تبدیلی کر کے انہیں سخت کرنے کی تجویز دی ہے۔مسافر، عملہ اور ہوائی جہاز کی سیکورٹی کے لیے برا برتاؤ کرنے والے مسافروں سے نمٹنے کے طریقوں پر سی اے آرمیں ترمیم کیا جا رہا ہے، شہری ہوا بازی کی وزارت مئی ماہ میں ہی غلط برتاؤ کرنے والے مسافروں پر تین ماہ سے لے کر زیادہ سے زیادہ دو سال تک ہوائی سفر کرنے پر پابندی لگانے کی ترامیم کا خاکہ جاری کر چکا ہے۔مجوزہ سی اے آر میں برے برتاؤکو تین زمروں میں تقسیم کیا گیا ہے۔پہلی سطح کے تحت برے برتاؤ میں رکاوٹ ڈالنے والے رویے کو رکھا گیا ہے، دوسری سطح پر جسمانی طور پر اشتعال انگیز رویے کو رکھا گیا ہے اور تیسری سطح میں جان کو خطرے میں ڈالنے والا برتاؤ رکھا گیا ہے۔حال ہی میں تلگودیشم پارٹی (ٹی ڈی پی)کے ایم پی جے سی دیواکر ریڈی اور ان کے حامیوں پر بھی وشاکھاپٹنم ہوائی اڈے پر ہنگامہ اور مار پیٹ کا الزام لگا ہے، اس کے بعد گھریلو ہوا بازی کمپنیوں نے ریڈی کے ہوائی سفر پر پابندی لگا دی ہے۔ریڈی آندھرا پردیش کے اننت پور لوک سبھا حلقے سے ممبر پارلیمنٹ ہیں، مرکزی ہوابازی کے وزیر اشوک گجپتی راجو بھی ٹی ڈی پی کے ہی ہیں۔