سمستی پور،16اگست(ایس او نیوز؍آئی این ایس انڈیا)’’مٹی میں مل جاؤں گا، لیکن بی جے پی میں نہیں جاؤں گا‘‘ کہنے والے نتیش کمار اب بی جے پی کے ساتھ ہیں، جس عوام نے ان کو ووٹ دیا تھا اب وہ اس کے وزیر اعلی نہیں ہیں بلکہ اقتدار کے وزیر اعلی ہیں۔ انہوں نے ریاست کی عوام کو دھوکہ دینے کا کام کیا۔مینڈیٹ اپمان یاترا پر نکلے راشٹریہ جنتا دل کے لیڈر تیجسوی یادو نے سمستی پور میں کہا کہ نتیش کمار اخلاقی بدعنوانی کے بھیشم پتامہ ہیں۔تیجسوی یادو نے کہا کہ نتیش کمار ریاست کی عوام کو دھوکہ دے کر گاندھی کے قاتلوں سے مل گئے ہیں۔ ریاست کی عوام نے کسی شخص کو ووٹ نہیں دیا تھا، بلکہ اتحاد کو ووٹ دیا تھا، لیکن نتیش کمار نے عوام کے مینڈیٹ کو درکنار کرکے ان کے ساتھ ہاتھ ملا لیا جس کے خلاف ہم لوگوں نے لڑائی لڑی تھی۔تیجسوی نے کہا کہ ہماری پارٹی نے کافی جدوجہد کے بعد ریزرویشن کو متعارف کروایا، ریاست کی عوام کے ساتھ انصاف کرنے کا کام کیا لیکن نتیش کمار اب مودی کے ساتھ مل گئے ہیں اور ریزرویشن کو ختم کرانا چاہتے ہیں۔

سمستی پور میں تیجسوی یادو نے کہا کہ یہی وہ زمین ہے جہاں لالو جی نے اڈوانی کی قیادت والے رتھ کو روک کر پورے ملک کو امن اور بھائی چارے کا پیغام دیا تھا، لیکن یہاں کی رائے عامہ پر جتنے والے نتیش کمار یہاں کی عوام کو دھوکہ دے کر بی جے پی کے ساتھ مل گئے۔تیجسوی نے کہا کہ نتیش کمار کو بی جے پی میں جانا تھا، وہ تو صرف بہانہ تلاش کر رہے تھے۔تیجسوی کا کہنا تھا کہ نتیش کمار مرکز کے ساتھ مل کر ان کے خاندان پر چھاپہ ڈلوا رہے ہیں اور ڈرانے کا کام کر رہے ہیں۔

تیجسوی نے کہا کہ ہم نے نتیش کمار سے کہا تھا کہ اگر میرا استعفی چاہئے تو بتا دیجئے ہم لوگ اتحاد کے لئے کوئی بھی قربانی دینے کو تیار ہیں لیکن نتیش کمار کی بی جے پی سے پہلے میچ فکسنگ ہو گئی تھی تبھی تو استعفی کے پانچ منٹ کے اندر ہی مودی جی نے مبارکباد دے دی اور اگلے دن صبح ہی وہ پھر سے بہار کے وزیر اعلی بن گئے۔تیجسوی نے کہا کہ ایک 28 سال کا نوجوان اس کے اصولوں سے نہیں ڈگمگایا لیکن نتیش کمار اپنی کرسی کے خاطر آر ایس ایس کے سامنے گھٹنے ٹیک دئے۔تیجسوی نے کہا کہ نتیش کمار اور سشیل مودی پر مقدمہ چل رہا ہے تو کیوں یہ وزیر اعلی اور نائب وزیر اعلی بنے ہوئے ہیں؟۔

بہار میں سیلاب کے حالات پر تیجسوی نے حکومت کو کٹہرے میں کھڑا کیا اور کہا کہ اس دوران یہاں 50 سے زیادہ لوگوں کی موت ہو گئی ہے، اس کے لئے کون ذمہ دار ہے؟ سب کو پتہ ہے کہ سیلاب کے وقت میں ایسے حالات بن جاتے ہیں تو پھر پہلے اس کی تیاری کیوں نہیں کی گئی؟۔

160سمستی پور میں تقریر کے دوران تیجسوی نے کہا کہ اب اگلا پڑاؤ بھاگلپور ہوگا جہاں میں ایک بڑے گھوٹالے کو پردہ فاش کرنے جا رہا ہوں۔تیجسوی نے کہا کہ یہ تمام لوگ لالو سے ڈرے ہوئے ہیں۔ بہار میں ہمارا مہاگٹھ بندھن شرد جی کے جے ڈی یو کے ساتھ ہے اور رہے گا۔