تمل ناڈو: تانبہ پلانٹ کی مخالفت میں پرتشدد احتجاج ، 9 افراد ہلاک
تمل ناڈو 22مئی ( ایس او نیوز؍آئی این ایس انڈیا) تمل ناڈو کے توتی کورین میں ویدانتا سٹر لائٹ کاپر یونٹ کے خلاف احتجاج نے تشدد کا راستہ اختیار کرلیا ۔ اس احتجاج میں اب تک کل 9 لوگوں کی موت ہوچکی ہے اور کئی لوگ زخمی بھی ہیں۔ واضح ہو کہ اسٹر لائٹ سے پیدا ہونے والی آلودگی کو دیکھتے ہوئے مقامی باشندگان کئی ماہ سے یہاں اسٹر لائٹ کاپر یونٹ کی مخالفت کر رہے ہیں۔ واقعہ میں ہلاک ہونے والوں کے علاوہ کئی افراد زخمی بھی ہوئے ہیں اور پورے شہر میں کشیدگی کا ماحول بنا ہوا ہے۔ عوامی احتجاج کے پیش نظر پولیس نے سی آر پی سی کی دفعہ 144 نافذ کرکے حالات کو قابو میں کرنے کی کوشش کی ہے ۔ غور طلب ہے کہ مدراس ہائی کورٹ کے حکم کے مطابق اسٹر لائٹ کاپر یونٹ کو تحفظ مہیا کرایا جا رہا ہے۔ منگل کو یونٹ کی مخالفت میں مظاہرہ کر رہی بھیڑ اچانک مشتعل ہو گئی اور سکیورٹی اہلکار سے ہاتھاپائی شروع کر دی۔ لوگوں نے پولیس کے کئی گاڑیوں کو بھی نشانہ بنایا۔