آئندہ لوک سبھا الیکشن مودی بنام بھارت ہوگا : کانگریس
کولکاتا21جون (ایس او نیوز؍ آئی این ایس انڈیا ) مغربی بنگال کے نئے کانگریسی سربراہ گورو گوگوئی نے پیر کو دعوی کیا ہے کہ 2019 لوک سبھا انتخابات نریندر مودی اور بقیہ بھارت کے درمیان لڑا جائے گا اور ان کی پارٹی مرکز میں حکومت بنائے گی۔راہل گاندھی کے قریبی سمجھے جانے والے گوگوئی نے اعتماد ظاہر کرتے ہوئے کہا کہ کانگریس آئندہ عام انتخابات میں اپنی سیٹوں کی تعداد میں اضافہ کرے گی اور حکومت بنائے گی۔ گوگوئی نے نامہ نگاروں سے کہا کہ واپسی کرنا ہمارے ڈی این اے میں ہیں کیونکہ ہمارے اقدار اور ہمارا ایجنڈہ سماج اور ملک کے موافق ہے اور اس ملک کے عوام کو عوام مخالف حکومت کے زوال کا بے صبری سے انتظار ہے ۔ آسام کے سابق وزیراعلیٰ ترون گوگوئی کے بیٹے گورو فی الحال اپنے آبائی ریاست کالیابور سیٹ سے لوک سبھا کے رکن ہیں۔گوگوئی نے کہا کہ بی جے پی اس سوال کو سامنے لانے کی کوشش کرتی ہے کہ نریندر مودی کے خلاف کون اترے گا۔ میرا جواب ہے کہ آئندہ لوک سبھا الیکشن نریندر مودی اور اس ملک کی عوام کے درمیان ہوگا ۔ انہوں نے یہ بھی کہا کہ مودی جیسی ذات کوئی ناقابل تسخیر نہیں ہے ؛ بلکہ یہ اس کی تسخیر کی کہانی زر خرید میڈیا نے رکھی ہے ۔