پتور: حال ہی میں شادی رچانے والے ایک شخص کی پھانسی لگا کر خود کشی
پتور14؍اگست (ایس او نیوز)یہاں سے قریب کوڈیمباڈی گاؤں میں پچھلے چند مہینوں قبل ہی شادی رچانے والے نوجوان کی جانب سے پھانسی لگاکر خود کشی کرلینے کی واردات پیش آئی ہے۔ موصولہ تفصیلات کے مطابق ہلاک ہونے والے کانام کیشو گوڈا (۳۰سال)ہے جو کہ پیشے سے کارپینٹر تھااور فرنیچر فروخت کیا کرتا تھا۔ اور اس کی شادی امسال اپریل میں ہوئی تھی۔
کہتے ہیں کہ کیشو گوڈا صبح کے وقت دودھ خریدنے والی سوسائٹی کے مرکز میں دودھ پہنچانے کے لئے گیا تھا تو پھر پلٹ کر نہیں آیا۔اسے تلاش کرنے میں جب گھر والے ناکام ہوئے تو انہوں نے پولیس میں شکایت درج کروائی۔اسی دوران خبر آئی کہ بیرامالے پہاڑی پر کسی نوجوان نے درخت سے پھندا لگاکر خود کشی کی ہے تو کیشو کے گھر والے اس مقام تک پہنچے اور تصدیق کی کہ یہ کیشو گوڈا ہی کی لاش ہے۔
پتور ٹاؤن پولیس اسٹیشن میں خودکشی کا کیس درج کرلیا گیا ہے۔کیشو نے کن مسائل کی وجہ سے اس طرح کا اقدام کیا ہوگا اس بارے میں اس کے گھر والے کچھ بھی بتانے سے قاصر ہیں۔پولیس اس تعلق سے تحقیقات کررہی ہے۔