جوئیڈا:یکم فروری (ایس اؤنیوز)طلبا اگر اپنے مستقبل کو روشن بنانا چاہتے ہیں اور ایک بہتر زندگی کے مالک بننا چاہتے ہیں تو انہیں چاہئے کہ ان کی منزل کا راستہ بالکل واضح ہو۔ نشان زدہ راہوں سے گزر کر ہی انسان کامیابی کے منازل طئے کرتاہے۔ ان خیالات کا اظہار ضلع نگران کاروزیر آر وی دیش پانڈے نے کیا۔

وہ یہاں جمعرات کو جوئیڈا میں دوسرے مرحلے میں نوتعمیرشدہ سرکاری پالی ٹکنک کالج کا افتتاح کرنے کے بعد خطاب کررہے تھے۔ وزیر موصوف نے کہاکہ طلبا زندگی کا ایک واضح مقصدرکھیں، اس کو پانے کے لئے کٹھن محنت،مشقت ضروری ہوتی ہے اس کے عادی بنیں۔طلبا جب ان راہوں سے گزرتے ہیں تو والدین اور شہر کے لئے عزت کا باعث بنتے ہیں بہتر زندگی بنتی ہے۔نوتعمیر شدہ کالج کے متعلق بتایا کہ پالی ٹکنک کالج میں بڑے اہتمام کے ساتھ تمام طرح کے جدید سہولیات فراہم کئے گئے ہیں۔ لیباریٹری ، سائنٹفک اشیاء، مشین وغیرہ سے سجایا گیا ہے ۔ تدریسی اور غیر تدریسی عملہ بھی موجود ہے طلبا ان تمام سے استفادہ کرنےکی اپیل کی۔

جوئیڈا کو پچھڑے تعلقہ جات میں شمار کیا جاتاہے مگرحالیہ ترقی نے اس کو ترقی یافتہ تعلقہ جات میں لاکھڑاکیاہے۔ دیش پانڈے نے تعلقہ کی دیرینہ مانگ ثقافتی بھون کی تعمیر 7سے8کروڑ روپیوں کی لاگت سے کئے جانے کا اعلان کیا۔ پروگرام میں جوئیڈا تعلقہ پنچایت کی صدر ، ممبران اور مختلف محکمہ جات کے افسران موجود تھے۔