غیر قانونی آپٹک فائبر کے خلاف کارروائی، کمپنیوں پر 25لاکھ کا جرمانہ کیا جائے گا: پرمیشور
بنگلورو،11؍جولائی(ایس او نیوز)نائب وزیراعلیٰ ڈاکٹر جی پرمیشور نے کہاکہ برہت بنگلور مہانگر پالیکے کی حدود میں سڑکوں کے کنارے درختوں کے پاس مختلف کمپنیوں کی طرف سے جو آپٹک فائبر تاریں غیر قانونی طور پر کھینچی گئی ہیں ان کی نشاندہی کرکے خاطی کمپنیوں کے خلاف 25لاکھ روپیوں تک کا جرمانہ لگایا جائے گا۔
آج ریاستی لیجسلیٹیو کونسل میں انہوں نے کہاکہ جن تاروں کی نشاندہی کی جائے گی ان تمام کو کاٹ دیا جائے گا۔ اور فوری طور پر ان کمپنیوں کے خلاف سخت کارروائی کی جائے گی۔
انہوں نے کہاکہ بی بی ایم پی حکام کو ہدایت دی جاچکی ہے کہ غیر قانونی طور پر جو تار شہر بھر میں پھیلے ہوئے ہیں ان کی نشاندہی کی جائے اور جن کمپنیوں کی طرف سے یہ تار نصب کئے گئے ہیں ان کے خلاف بلامروت کارروائی یقینی بنائی جائے۔